“Xalqın Prezidentə etimadının əsas səbəbi budur” - AÇIQLAMA
Bunu Ölkə.az-a açıqlamasında Milli Məclisin deputatı Rövşən Muradov deyib.
O qeyd edib ki, bu etimadın ən böyük mənəvi dayağı Qarabağ Zəfəri və milli qürurun bərpasıdır:
“Müharibədən əvvəl cəmiyyətin müəyyən hissəsində işğal olunmuş torpaqlara qayıdışla bağlı ümidlər zəifləmiş, illərin uzanan danışıqları insanlarda ağır psixoloji yorğunluq yaratmışdı. Lakin Prezident İlham Əliyevin rəhbərliyi ilə Azərbaycan xalqı gördü ki, tarix dəyişə, ədalət bərpa oluna və itirilmiş kimi görünən torpaqlar yenidən Vətənin ayrılmaz parçasına çevrilə bilər. Bu qələbə yalnız hərbi uğur olmadı,həmçinin o, xalqın sınmış inamını dirçəltdi, milli yaddaşa güc verdi, Azərbaycan insanına qalib xalq olmağın qürurunu yaşatdı. Məhz buna görə Prezidentə olan sevgi sadəcə siyasi rəğbət səviyyəsində qalmadı, xalqın şərəf və ləyaqət hissi ilə birləşdi”.
Milli Məclisin üzvü vurğulayıb ki, azad edilmiş ərazilərdə aparılan sürətli bərpa-quruculuq işləri və Böyük Qayıdış prosesi bu etimadı daha da möhkəmləndirən ikinci böyük amildir. Çünki vətəndaş artıq qələbənin yalnız hərbi paradlarda və tarixi xatirələrdə qalmadığını, real şəhərlərə, kəndlərə, məktəblərə, yollara, hava limanlarına və yaşayış məhəllələrinə çevrildiyini görür:
“Böyük Qayıdış Azərbaycan dövlətinin öz vətəndaşına verdiyi ən böyük mənəvi və siyasi vədin icrasıdır. İnsanların doğma yurdlarına qayıtması təkcə məskunlaşma prosesi sayıla bilməz. Bu dövlətə inamın canlı mənzərəsidir. Çünki insan təhlükəsizliyinə, gələcəyinə, övladının sabahına inanmasa, illərlə həsrətində olduğu yurda qayıtmaq qərarını bu qədər böyük inamla verə bilməz”.
Rövşən Muradov söyləyib ki, Prezident İlham Əliyevə olan yüksək etimadın mühüm səbəblərindən biri də Azərbaycanın formalaşdırdığı güclü dövlət obrazıdır. Onun fikrincə, bu gün Azərbaycan Cənubi Qafqazda yalnız coğrafi mövqeyinə görə seçilən ölkə deyil, hərbi qüdrəti, iqtisadi dayanıqlığı, enerji diplomatiyası, nəqliyyat-logistika imkanları və müstəqil xarici siyasəti ilə regionun əsas güc mərkəzlərindən biridir.
Deputat bildirib ki, Azərbaycan Ordusunun yaratdığı yeni reallıq dövlətin təhlükəsizlik fəlsəfəsini dəyişdirdi, ölkənin siyasi çəkisini artırdı və beynəlxalq tərəfdaşların Bakıya münasibətini daha ciddi strateji müstəviyə keçirdi:
“Son dövrlərdə Avropa strukturları ilə siyasi dialoqun genişlənməsi, beynəlxalq enerji və nəqliyyat layihələrinin Azərbaycan üzərindən qurulması, Azərbaycan–ABŞ münasibətlərində iqtisadi və strateji gündəliyin dərinləşməsi göstərir ki, Bakı artıq prosesləri izləyən tərəf deyil, onları istiqamətləndirən aktorlardan biridir. Vətəndaş da bu mənzərəni görür və anlayır ki, belə bir dövlət obrazı təsadüfi diplomatik fəallığın deyil, uzunmüddətli siyasi iradənin nəticəsidir.
Xalqın Prezident İlham Əliyevə sevgisini və etimadını izah edən əsas məqam da budur. Azərbaycan vətəndaşı bu liderliyin nəticəsini öz həyatında, dövlətinin mövqeyində, xalqının qürurunda və ölkəsinin sabahında görür. Torpaqların azad olunması, suverenliyin bərpası, Qarabağda həyatın yenidən qurulması, güclü ordunun formalaşması, beynəlxalq aləmdə Azərbaycanın söz sahibinə çevrilməsi və ölkədə sabitliyin qorunması cəmiyyətin siyasi yaddaşında dərin iz buraxıb. Bu siyasi və mənəvi nəticələrin bütövlüyü Prezidentə olan etimadı yalnız emosional münasibət səviyyəsində saxlamır, onu xalqın öz dövlətinə, gələcəyinə və milli taleyinə inamının ifadəsi kimi formalaşdırır”.
