“O, peşəkar böhtançıdır” - Qafarovanı ittiham etdi, sərt cavab aldı
Ölkə.az xəbər verir ki, bunu Böyük Quruluş Partiyasının rəhbəri, Milli Məclisin İctimai birliklər və dini qurumlar komitəsinin sədri, deputat Fazil Mustafa deyib.
Siyasətçi qeyd edib ki, özünə qarşı məzhəb faşistlərinin törətdiyi terror hadisəsi ilə bağlı keçirilən məhkəmə prosesində terrorçular müdafiə üçün əsas arqumentlərdən biri kimi Sərdar Cəlaloğlunun fikirlərinə baş vururdular:
“Bu barədə “Cəhalət gülləsi, aydınlıq çiləsi” adlı kitabımda da ətraflı bəhs etmişəm. Bu gün isə Milli Məclisinin sədri Sahibə xanım Qafarova haqqında Sərdar Cəlaloğlunun bir ay öncə verdiyi video-müsahibədə və bu çıxışın “TikTok” sosial şəbəkəsindəki kəsintisində səsləndirdiyi fikirlər qarşıma çıxanda qətiyyən təəccüblənmədim. Peşəkar böhtançının bu dəfəki hədəfi yalnız ali dövlət vəzifəsində çalışan bir siyasətçi deyil, həm də elm xadimi olan ziyalı bir Azərbaycan xanımı idi. Sərdar Cəlaloğlu bildirirdi ki, Sahibə xanım Qafarovanın sədr seçilməzdən öncə Bakı Slavyan Universitetində prorektor olaraq çalışdığına görə Rusiyanın maraqlarına xidmət etdiyi qənaətindədir. O, həmçinin Slavyan Universitetini Rusiyanın maraqlarını açıq şəkildə müdafiə edən bir mərkəz kimi xarakterizə edib və həmin ali təhsil ocağından olan bir şəxsin Milli Məclisə sədr seçilməsini narahatlıq doğuran məsələ olduğunu vurğulayıb”.
F.Mustafanın fikrincə, burada söhbət sadəcə böhtandan getmir, uzun illər siyasi həyatda olan və az-çox kitab mütailəsi ilə seçilən bir siyasətçinin axtarıb tapdığı bu qədər bəsit, səfeh bir arqumentdən gedir:
“Maraqlıdır ki, bu təhsil müəssisəsində çalışmazdan öncə Sahibə xanım Qafarova paytaxtımızda yerləşən Qərb Universitetində prorektor vəzifəsində olub. Bu ağılla Sərdar Cəlaloğlu gərək söyləyəydi ki, öncə Qərbə bağlı olub, sonra Rusiyaya yönəlib. Demək ki, bu böhtançının düşüncəsinə görə Bakı Slavyan Universiteti Rusiyanın “arxa bağçası” imiş və orada kim çalışmışsa, oxumuşsa dolayı yolla Rusiyaya xidmət edib. O halda Azərbaycan Dillər Universiteti hansı statusda olur? ABŞ imperializminə, yaxud alman ideologiyasına, Fransa mədəniyyətinə xidmət edənlərin məkanımı? Yaxud mənim kimi on minlərlə insanın məzun olduğu Bakı Dövlət Universiteti vaxtilə Kirov adına Azərbaycan Dövlət Universiteti adlanırdı, bu məntiqsizliyə görə bəlkə bizlər də oraya Kirova, dolayı yolla Sovet Rusiyasına olan gizli rəğbətimizə görə daxil olmuşuq? Bəs Sərdar Cəlaloğlunun illər öncə məzunu olduğu Tibb Universiteti necə? Dünya orqan köçürmə mafiyasına mütəxəssis yetişdirən bir məkan olmasın ha...
Sahibə xanımın özkeçmişi ilə tanış olan hər bir vicdanlı insan təsdiq edər ki, o, dürüst və obyektiv bir ziyalı xanım olmaqla yanaşı, öz ixtisası üzrə ən savadlı alimlərdən biridir. Parlamentə sədr seçiləndən sonra bütün beynəlxalq platformalarda Azərbaycanı yüksək intellektual qabiliyyəti ilə layiqincə təmsil edir. İndi hansısa axmaq çıxıb söyləsə ki, rus dilində bu cür mükəmməl səviyyədə danışırsa, demək Rusiyaya yaxındır, ingilis dilində öz ana dili səviyyəsində çıxış edirsə, görüşlər keçirirsə, beynəlxalq təşkilatların tədbirlərinə sədrlik edirsə, o halda ABŞ-a və ya Avropa Birliyinə yaxındır, bu iddiaları ciddi qəbul edənlərin ağlından şübhə etməzsinizmi?”.
Komitə sədri qeyd edib ki, dəfələrlə bu cür şəxslərin böhtanlarına məruz qalmış və anında alın açıqlığıyla cavablarını vermiş bir siyasətçi kimi burada təəssüfləndiyim bir məqam da var:
“Tez-tez söyləyirik ki, Azərbaycanda qadınların siyasi həyatda, dövlət vəzifələrində sayı azdır, yaxud da rolları aşağıdır. Ardınca da biriləri utanmadan, çəkinmədən açıq-aşkar böhtan olduğunu bildiyi halda ölkəni layiqincə təmsil edən bir siyasətçi xanıma qarşı bu cür qarayaxmaya baş vurursa, bu hallar bəri başdan xanımlarımızın siyasi aktivliyini, cəsarətini əngəlləyən amilə çevrilir. Kiminsə siyasi platformasını, baxışlarını qəbul etməmək normal bir təzahürdür, ancaq yüzlərlə müəllimin çalışdığı, tələbənin təhsil altığı hansısa bir təhsil ocağını töhmət altında buraxmaq qətiyyən əxlaqlı davranış sayıla bilməz”.
Milli Cəbhə Partiyasının sədri, deputat Razi Nurullayev də S.Cəlaloğluna sərt cavab verib. Onun fikrincə, Milli Məclisin sədri kimi Sahibə Qafarova daima qanunverici hakimiyyətin işinin daha səmərəli qurulmasına, parlament diplomatiyasının inkişafına və Azərbaycanın mövqeyinin beynəlxalq platformalarda ardıcıl şəkildə təqdim olunmasına çalışıb:
“Bu gün parlamentin rolu yalnız qanunların qəbulundan ibarət deyil, eyni zamanda ölkənin maraqlarının düzgün və aydın şəkildə dünyaya çatdırılmasını da əhatə edir. Bu baxımdan onun fəaliyyəti dövlətçilik prinsipləri ilə təmamilə uyğunluq təşkil edir”.
R.Nurullayev vurğulayıb ki, parlament müxtəlif baxışların təmsil olunduğu bir məkan olduğundan, onun sağlam işləməsi üçün qarşılıqlı hörmət, açıq dialoq və məsuliyyətli yanaşma vacibdir.
O deyib ki, S.Qafarovanın bu prinsiplərə önəm verməsi qanunvericilik sisteminin sabit və ardıcıl fəaliyyətinə müsbət təsir göstərir: “Dövlət maraqlarını hər zaman şəxsi və ya siyasi maraqlardan üstün tutmaq isə hər bir dövlət xadimi üçün əsas meyardır və bu yanaşma ölkənin daha da güclənməsinə xidmət edir.
Çox təəssüf ki, bu gün ən çox işləyənlər, dövlətçiliyə ən çox xidmət edənlər, saf və prinsipial insanlar tez-tez paxıl və qərəzli yanaşmaların hədəfinə çevrilirlər. Lakin sevindirici haldır ki, bu cür təzyiqlər dövlət və dövlətçilik əxlaqına sadiq olan dövlət adamlarını yolundan döndərmir. Əksinə, bu insanlar öz mövqelərində daha da möhkəmlənərək fəaliyyətlərini davam etdirirlər. Dövlət də məhz belə insanların kollektiv şəkildə çiyinlərində daşınır. Sahibə Qafarova da bu xüsusiyyətləri ilə seçilən, dövlətə sədaqətlə xidmət edən dövlət xadimlərindən biridir”.
