“Axı biz hansı dövrdə yaşayırıq?” - Siyavuş Novruzov parlamentdə sərt danışdı

Ölkə.az xəbər verir ki, bunu Milli Məclisin Regional məsələlər komitəsinin sədri Siyavuş Novruzov parlamentin iyulun 14-də keçirilən iclasında deyib.

O bildirib ki, bu məsələlərlə bağlı bir məqama da toxunmaq istəyir: “Söhbət Naxçıvan hava reysləri ilə bağlı yaranmış vəziyyətdən gedir. Biz Naxçıvandan seçilmiş millət vəkilləri olaraq görürük ki, təyyarə reysləri, demək olar, avtobus reysinə çevrilib. Bilinmir təyyarə nə vaxt gələcək, nə vaxt uçacaq.

Vətəndaş aeroporta gəlir, ona deyirlər ki, reys üç saat gecikəcək. Bilet alır, sonra məlum olur ki, bileti növbəti günə keçiriblər. Axı biz hansı dövrdə yaşayırıq? Bu gün hər kəsin mobil telefonu var, elektron sistemlər mövcuddur, yeni innovasiyalar tətbiq edilir. Heç olmasa sərnişinlərə əvvəlcədən mesaj göndərilsin ki, məsələn, reys üç saat təxirə salınıb”,- S.Novruzov vurğulayıb.

Deputat əlavə edib ki, bu problem həm Bakıdan Naxçıvana, həm də Naxçıvandan Bakıya olan reyslərdə müşahidə olunur:  “Lakin bunun səbəbi barədə heç kim izahat vermir. Vətəndaş uzaq kənddən taksi ilə aeroporta gəlir, əlavə xərc çəkir, sonra ona bildirilir ki, uçuş sabahdır və həmin gün reys yoxdur. Yaxud deyirlər ki, üç saatdan sonra yenidən aeroporta gəlsin. Belə olan halda ya üç saat aeroportda gözləməli, ya da geri qayıdıb yenidən aeroporta gəlməli olur. Nəticədə beş saata yaxın vaxt itirir.

Ona görə də aidiyyəti komitələrdən xahiş edirəm ki, bu məsələ ilə məşğul olsunlar. Səbəbləri araşdırsınlar və insanlara izah etsinlər. Vətəndaşlar səbəbi bilsələr, bunu anlayışla qarşılayacaqlar. Blokada şəraitində yaşayan Naxçıvan əhalisinin heç olmasa bu hüquqları təmin olunmalıdır”.

Milli Məclis sədrinin birinci müavini Əli Əhmədov buna cavab olaraq deyib ki, həqiqətən də təyyarə reyslərinin gecikməsi və belə halların baş verməsi təkcə Naxçıvana aid məsələ deyil.

“Hava şəraiti və digər fövqəladə hallarla əlaqədar reyslərin gecikməsi baş verir. Bu da təbii olaraq sərnişinlər üçün müəyyən çətinliklər yaradır və narazılıqlara səbəb olur. Güman edirəm ki, səsləndirdiyiniz fikirlər müvafiq qurumların diqqətinə çatdırılacaq”,- o bildirib.

Mürtəza