Razi Nurullayev: "Azərbaycan xalqının bir nömrəli düşməni Əli Kərimlidir"
"Mən siyasətdə dözümlülüyün tərəfdarıyam. Özünü tənqidin tərəfdarıyam və hər bir siyasətçinin tənqidlərə xoş görümlü yanaşmasının tərəfdarıyam. Amma təəssüf, bütün xalq da şahidlik etdi ki, Əli Kərimli öz tərəfdarlarına biz partiyadan ayrıldıqdan sonra bizi ən ağır sözlərlə təhqir etmək tapşırığı vermişdi və o təhqirlər bu gün də davam edir".
Ölkə.Az xəbər verir ki, bu sözləri son günlər Əli Kərimli və Natiq Cəfərli arasında yaranan qalmaqala münasibət bildirən Azərbaycan Xalq Cəbhəsi Partiyasının sədri Razi Nurullayev deyib. Sədr bildirib ki, bu təhqirləri bir çoxları öz adları ilə etsələr də, amma onlarla, yüzlərlə saxta profillər vasitəsilə də həyata keçirirlər:
"Və biz o zaman demişdik ki, bu tək bizim şəxsimizə edilən təhqir deyil, zaman-zaman bu cür təhqirlər, bu cür hədə-qorxular bütün siyasətçilərə qarşı istifadə olunub. İsa Qənbərə qarşı istifadə olunub, Sərdar Cəlaloğluna qarşı istifadə olunub, Lalə xanıma qarşı istifadə olunub, Müsavatın digər funksionerlərinə qarşı təhqirlər həyata keçirilib və eyni zamanda digər siyasətçilərə və vətəndaş cəmiyyəti təmsilçilərinə. Kim Əli Kərimliyə tərif deyirsə o, dostdur, ona tərif deməyən, hətta onu haqlı tənqid edənlər də onun düşmənləridir. Bu zaman onlarla zombi və onların idarə etdikləri yüzlərlə saxta profillər həmin insanların üzərinə gedir və onları təhqirlərə məruz qoyurlar. O zaman da biz demişdik ki, bu yalnız bizim şəxsimizə qarşı deyil, zaman-zaman bütün siyasətçilərə qarşı istifadə olunacaq. Onun üçün də məhz Əli Kərimli intriqasını, siyasətini Azərbaycan siyasətindən məhrum etmək, silmək lazımdır. Amma hər bir kəs əfsuslar olsun ki, şəxsi görüşlərdə, fərdi yazışmalarda, telefon zənglərində bizə dəstəklərini ifadə etdilər, lakin cürət edib birbaşa açıq şəkildə bu cür təhqirlərə yol verilməzliyini dilə gətirmədilər və Əli Kərimliyə qarşı heç bir tənqidi mövqe sərgiləmədilər. Çünki, qorxdular ki, zombilər onların üzərinə gələr. Artıq bu gün yenidən zombilər qızışıb. Bu yaxınlarda bir neçə politoloq və iqtisadçının ünvanına təhqirlər yağdırılıb və onlar da bunu ictimailəşdiriblər. Təbii ki, həmin insanları müdafiə etmək üçün yox, azad sözü, tənqidə dözümlülüyü təbliğ etmək üçün, müdafiə etmək üçün hal-hazırda bizim partiya bu məsələyə qoşulub. Biz yenidən siyasətdə təhqirə yol verilməzliyin mümkünsüzlüyünü və olmamasını şərt kimi irəli sürür və bununla bağlı kampaniya aparırıq. Onlar buna görə hər zaman üzərimizə gəliblər, yenə də gəlməkdə davam edirlər. Biz bundan qorxmuruq, düzgün bildiyimizdən qorxmuruq və qorxmayacağıq da. Siyasətdə təhqirə yol verənlər vicdansızdırlar, insanlara saxta profillər və yaxud öz adları altında təhqir elementləri yağdıran, onlara ana, bacı söyüşləri söyməkdən belə çəkinməyən insanlar ən alçaq və yaramaz adamlardır. Bu alçaq, yaramaz adamlar əslində cəza çəkməlidirlər. Belə bir hal yaranıb ki, hansısa bir müxalifət adı altında gizlənib min oyundan çıxan adamla bağlı polisə şikayət edirsənsə, demək sən müxalifətçi deyilsən. Amma əslində hər bir kəs özündə bir cəsarət tapıb həmin insanlarla bağlı qəti mövqe ortaya qoymalıdır. Təhqirlərə yol verən insanlar yaramazdırlar, alçaqdırlar və onlar polisə təhvil verilməlidir, polis ölçü götürməlidir, qanunun tələb etdiyi qaydada cəzalandırılmalıdır. Çünki cəzasızlıq mühiti daha böyük təhqirlərə yol açır. Onun üçün də bütün siyasətçilər bu barədə daha ciddi düşünməlidirlər. Bu gün Əli Kərimli bizi təhqir edir. Bu insan onun yazılarında müəyyən bir səhvlər axtaran, onun səhvlərini yazan insanları təhqirlərə məruz qoyursa, onlara qarşı irgənc bir kampaniya aparırsa, sabah digərlərinin də başında bu oyunlar çatlayacaq. Onun üçün də belə halda birləşmək və Əli Kərimli intriqasını, yurd intriqasını Azərbaycan siyasətindən silmək, məhv etmək lazımdır".
"Bu gün İlqar Məmmədovun həbsdən çıxması üçün müəyyən şərait yaranıb” deyən AXCP sədri bildirib ki, məhz belə bir şəraitdə Əli Kərimlinin ətrafının REAL üzvlərini hakimiyyətə çalışmaqda ittiham etməsi təxribatdır:
"Təbii ki, əgər bu gün müxalifət arasında intriqa baş verirsə, müxalifət təmsilçiləri hakimiyyətə satılmaqda günahlandırılırsa və əgər REAL Hərəkatının sədri İlqar Məmmədov bu gün hakimiyyətin terroru ilə üzləşərək həbsxanada can çürüdürsə, onun tərəfdarları bu gün hakimiyyətə qarşı ən sərt sözlər və təhqirlər yağdırırsa və bu gün Əli Kərimli və onun tərəfdarları REAL üzvlərini, onun yazarlarını, onun siyasətçilərini, fəallarını hakimiyyətə satılmaqda, hakimiyyətin çörəyinə yağ sürtməkda günahlandırırsa, bu elə birbaşa İlham Əliyevə qulluq etməkdir. Belə görünür ki, Əli Kərimli və onun tərəfdarları göstəriş alır, bu göstərişə uyğun olaraq hərəkət edirlər. Bu gün İlqar Məmmədovun həbsdən çıxması üçün müəyyən şərait yaranıb. Bəlkədə əfv oluna bilər. Belə bir məqamda yenidən Əli Kərimli və tərəfdarları REAL-ı hakimiyyətə satılmaqda günahlandırırlar. Sanki burada bir koordinasiya gedir. Onun üçün də çox ciddi araşdırılmalıdır ki, bu gün hakimiyyətin çörəyinə yağ sürtən kimdir. Biz və digər siyasi partiyalar, yoxsa Əli Kərimli və tərəfdarları. Hətta onlar bunu bilərəkdən etmirlərsə, yenə də görünür ki, müxalifətə ziyan vurmaqla məşğuldurlar. Əli Kərimli özünü büt elan edib. Əli Kərimli şəxsiyyətini tənqid etmək olmaz. Necə ola bilir ki, biz İlham Əliyevi tənqid edə bilirik, bu gün Azərbaycanın baş nazirini sağa, sola tənqid edə bilirlər, Azərbaycan Respublikasının parlamentinin spikerini tənqid edə bilirlər, nazirləri yıxıb sürüyürlər, sosial şəbəkələrdə yüzlərlə insan tərəfindən təhqir olunurlar, onların şəkilləri kollaj edilib paylaşılır, bəzən yol verilməz şəkildə təhqirlərə məruz qalırlar və məhkəmələrə müraciət demək olar mümkün olmur, heç kim buna baş qoşmur, hər kəs qulaq ardına vurur, amma Əli Kərimli haqqında kimsə nəsə deyərsə, onun yazdıqlarına pis münasibət bəsləyərsə və yaxud tənqid edərsə həmin insan düşmən hesab olunur, "çıxdaşa" salınır. İndi baxaq görək kimdir Azərbaycan xalqının düşməni, kimdir Azərbaycan siyasətinin düşməni? Azərbaycan siyasətinin düşməni Əli Kərimlidir. Azərbaycanda iqtidara xidmət edən elə Əli Kərimli özüdür. Əgər bu gün Azərbaycan müxalifəti birləşə bilmirsə, Azərbaycan müxalifəti hər hansı bir anda bir araya gəlib birləşmək istəyərkən Əli Kərimli tərəfindən yenidən intriqalarla dağıdılırsa, elə Azərbaycan xalqının bir nömrəli düşməni, siyasi düşməni Əli Kərimlidir".
