Oqtay Əsədov: "Ermənilər Dağlıq Qarabağdan çıxana kimi mübarizə davam edəcək"
Milli Məclisin növbəti plenar iclası Qarabağda son günlər gedən uğurlu əməliyyatlara münasibətlə başlanılıb.
Ölkə.Az xəbər verir ki, spiker Oqtay Əsədov gündəliyə keçməzdən qabaq cəbhədə gedən döyüşlərə münasibət bildirmək istədiyini qeyd edib: “Bu illər boyu Azərbaycan atəşkəsə həmişə sadiq olub. Hər dəfə Azərbaycan hər hansı yüksək nailiyyətə nail olanda Ermənistan tərəfindən təxribatla rastlaşırdı. Mülki əhali böyük çaplı silahlarla atəşə tutulurdu. Son vaxtlar isə mərmilərdən mülki əhaliyə atəş açmağa başladılar. Azərbaycan ordusunun buna hövsələsi dözmədi. Aprelin 1- dən 2- nə keçən gecə Ermənistan qoşunlarına öz yerini göstərdi. O yüksəkliklər var idi ki, həmişə oradan Azərbaycan əhalisi hədəfdə idi. Azərbaycan o yüksəklikləri aldı. Azərbaycan bundan sonra müvəqqəti atəşkəs elan etdi. Amma Ermənistan buna əməl etmədi. XİN də ötən gün bəyanat yaydı ki, ermənilər Dağlıq Qarabağdan çıxana kimi mübarizə davam edəcək.
Azərbaycan əlindən gələni edəcək ki, torpaqlar azad olunsun və münaqişə həll olunsun. Biz status-kvonun saxlanılması ilə razı deyilik. Azərbaycan ordusuna dəqiq əməliyyatına görə təşəkkür edirik. Bizim şəhidlərimiz də var. Onların xatirəsi bir dəqiqəlik sükutla yad etməyi təklif edirəm”.
Bundan sonra millət vəkilləri şəhidlərin ruhunu bir dəqiqəlik sükutla yad ediblər.
