\"Gürcüstan çox tezliklə NATO-nun tam hüquqlu üzvü olacaq\"

Türkiyə Gürcüstanın NATO-ya qəbul olunmasını təklif edəcək.

Bunu Türkiyənin xarici işlər naziri Mövlud Çavuşoğlu deyib. Çavuşoğlunun sözlərinə görə, Gürcüstanın NATO-ya üzv olmaq üçün yoxlama proqramından keçməsinə ciddi ehtiyacın olmadığını bildirib. Gürcüstan NATO üzvü olmağa layiq ölkədir.

Bölgədəki vəziyyət və Rusiya faktorunun bu məsələyə necə təsir edəcəyi maraqla gözlənilir.

Bununla bağlı hərbi ekspert Üzeyir Cəfərov Ölkə.Az-a danışıb:

"Əslinə qalsa Gürcüstanla bağlı məsələ uzun müddətdir ki, Türkiyənin nəzarətindədir. Ona görə də, burada qeyri-adi heç nə görmürəm. Türkiyənin Gürcüstanla bağlı xahişi ona əsaslanır ki, bu illər ərzində Gürcüstan çox böyük yol keçib. Gürcüstanın NATO ilə bağlı heç bir problemi yoxdur. Düzdür, Gürcüstanın ərazisində konflikt var, ancaq Gürcüstan NATO-ya üzv olmağa hazırdır.

İstəsək də, istəməsək də, burada Rusiya maneə faktoru rolunu oynayacaq. Gürcüstanın NATO-ya üzv olması təkcə Türkiyənin arzusu deyil. Bu eyni zamanda NATO-nun özünün də istəyi, arzusudur. Sadəcə bunu Türkiyə dilə gətirir. Aydın məsələdir ki, Rusiya danışacaq, narazılığını bildirəcək, ancaq bu, narazılıq şəklində də qalacaq.

NATO-nun qərarı belədir ki, Gürcüstan və Ukrayna NATO-nun üzvü olmalıdır. Türkiyənin Gürcüstan üçün NATO-ya inteqrasiya yolunda çəkdiyi əziyyətlər hədər getməyib və Gürcüstan çox tezliklə NATO-nun tam hüquqlu üzvlərindən biri olacaq.

Gürcüstan tezliklə NATO-nun üzvü olduqdan sonra Rusiyanın işğalı altında olan əraziləri işğaldan azad olunacaq. Bu gedişlə Qarabağ məsələsindən daha tez Gürcüstanın ərazi bütövlüyü bərpa olunacaq. Çünki, beynəlxalq qurumların Dağlıq Qarabağla bağlı mövqeləri o qədər də səmimi deyil. Ancaq faktiki olaraq Gürcüstanla bağlı beynəlxalq qurumların sərgilədiyi münasibət, Gürcüstanın ərazi bütövlüyünün bərpası ilə nəticələnəcək".

Səxavət Məmməd
Ölkə.Az