"Uduzanlar məğlubiyyəti həzm etməyi bacarmalıdır"

Son günlər Müsavat partiyasından bir neçə gəncin istefa verməsinə və partiya daxilində baş verənlərə Müsavat partiyasının məclis üzvü, hüquqşünas Elman Fəttah Ölkə.az-a verdiyi açıqlamasında münasibət bildirib.

Elman Fəttah: "İstənilən halda Müsavat partiyasından kiminsə çıxmasını təəssüflə qarşılayırıq. İddialarla bağlı onu deyim ki, Müsavat partiyasında gənclərin sıxışdırılması mümkünsüz məsələdir. Bu cür söz-söhbələrin yaranmasına səbəb başqa partiyalarda olmayan seçkilərdir. Seçkilər gizli səsvermə yolu ilə keçirilir. Burada səs qazanmaq üçün partiyanın daxilində ciddi nüfuz sahibi olmaq lazımdır. Təbii olaraq partiyaya bir müddət əvvəl üzv olan şəxslər fenominal fəaliyyət göstərmədiyi təqdirdə partiya üzvləri arasında böyük bir nüfuza sahib olmurlar. Son seçkilərdə seçilmədiyini deyən gənclər məclisə boş qalan yerlərə 40 səs, Tural Abbaslı 56 səs alıblar.

Keçirilən seçkilərin nəticələri ilə bağlı narazılıqları anlayışla qarşılayırıq. Uğur əldə edə bilməyən, namizədin, uduzmuş şəxsin yaxınları, dəstəkçiləri bunu haqsızlıq kimi qəbul edir və istefa verirlər. Müsavat partiyasına başqan yeri bir postdur, namizədlər isə dörd nəfər. Onlardan biri seçilə bilər. Seçilməyənlər isə partiyada qalıb öz fəaliyyətlərini davam etdirməlidirlər. Böyük əksəriyyət fəaliyyətini davam etdirəcək, bəzilər isə xüsusi ilə gənclər, onlar siyasətlə yeni məşğul olduqları üçün məğlubiyyəti həzm edə bilmirlər. Ancaq bu dünyanın sonu deyil. Arif Hacılı və tərəfdarlarının Qubad İbadoğlu və tərədarlarını sıxışdırması ilə bağlı yayılan xəbərlər də tam əsassızdır. Qubad İbadoğlu oktiyabrın 6-da Müsavat partiyasının qərargahında geniş bir toplantı keçirdi. Onlar üçün qərargah işçiləri bütün lazımi şəraiti yaratdılar və bundan sonra da belə bir bir istək olsa, yenə də şərait yaradılacaq. Müsavat partiyasınnın tərəfdarları var, nə Arif Hacılının nə də Qubad İbadoğlunun böyük rəqəmlərlə hesablanacaq tərəfdarları yoxdur. Onların dəstəkçiləri var idi".

Səxavət Məmməd

Ölkə.az