Ekspert: "Azərbaycan KTMT-yə üzv olmayacaq"

Rusiyanın müdafiə naziri Sergey Şoyqunun Bakıya səfəri zamanı Azərbaycan rəhbərliyinə birgə hərbi struktur yaratmaq təklifini Ölkə.az-a hərbi ekspert Üzeyir Cəfərov şərh edib:

"Düşünmürəm ki, Azərbaycan Kollektiv Təhlükəsizlik Müqaviləsi Təşkilatına üzv olsun. Ona görə ki, orada Azərbaycan torpaqlarını işğal altında saxlayan Ermənistan var. Ermənistanın olduğu bir hərbi təşkilatda Azərbaycan üzv olmağa heç vaxt razı olmaz. O səbəbə görə ki, Ermənistan cəzalanmalıdır, 20 ildən artıqdır Azərbaycana qarşı işğalçılıq siyasəti həyata keçirir. O, işğalçılıq siyasətinə son qoymasa Azərbaycan heç vaxt bu təşkilatla bir yerdə ola bilməz.

Kollektiv Təhlükəsizlik Müqaviləsi Təşkilatına formal olaraq yalnız Qazaxıstan, Qırğızıstan, Belarus, Ermənistan və bir də Rusiyanın özü üzvdür. Onların da məqsədi odur ki, mini NATO modeli yaratsınlar və bunu özləri belə təsəvvür edirlər. Guya bunların bir yerdə olması hansısa təhlükənin qarşısını ala bilər. Əslində isə NATO-nun təkcə bir regionda yerləşən qüvvələrinə qarşı acizdilər. Əvvala bu təşkilatın güclü bir hərbi praktikası da yoxdur, ikincisi də bu təşkilatın rəhbəri rus generalı Nikolay Bardiyujadır. O da az qala hər həftə Ermənistana gedib-gəlir. Ermənilər də ruhlanırlar ki, Kollektiv Təhlükəsizlik Müqaviləsi Təşkilatı onlara dəstək olacaq, onları Azərbaycandan qoruyacaq. Əslinə qalsa Azərbaycandan qorunmağa ehtiyacda yoxdur. Azərbaycan Ermənistana hücum etməyə hazırlaşmır, ermənilərin işğal etdiyi torpaqlarını geri qaytarmaq istəyir".

Səxavət Məmməd

Ölkə.az