"Türkiyənin əsas problemləri gündəmdən çıxır"
Türkiyə-İsrail münasibətlərinin düzəlməsi xəbərinin yayılmasından sonra Türkiyə ilə Rusiya arasında baş verən gərginliyin ortadan qalxacağına dair xəbərlər gündəmə gəldi.
Artıq Türkiyə ilə İsrail arasında münasibətlərin düzəlməsi yolunda saziş imzalandı. Hər iki dövlətin xarici işlər nazirləri bəyanatla çıxış etdi. Bundan sonra Türkiyənin baş naziri Binali Yıldırım bildirdi ki, biz noyabrdan bu yana Rusiya ilə yaşananları yaşanmamış sayıb, yenidən yaxşı münasibətlər qurmağa başlayacağıq.
Türkiyə-İsrail, Türkiyə-Rusiya münasibətlərinin düzəlməsi barədə politoloq Qabil Hüseyinli Ölkə.Az-a danışıb:
"Rusiya ilə İsrail hadisələrinin eyni vaxta düşməsi təsadüfüdür. Uzun müddət idi ki, danışıqlar gedirdi. Sadəcə olaraq, danışıqların başa çatması bu dövrə təsadüf elədi. Artıq Türkiyənin həm İsrail, həm də Rusiya ilə münasibətlərinin bünövrəsi qoyuldu.
Zənnimcə, baş verənlər çox böyük əhəmiyyətə malikdir. Çünki, Türkiyə yaxın qonşuları ilə əvvəllər yaxşı olan münasibətlərini yenidən normallaşdırır. Bu münasibətlərin qaydaya salınması nəticə etibarı ilə Türkiyənin mövqeyini xeyli yaxşılaşdıracaq. Bu günlərdə Rusiya prezidenti ilə Türkiyə prezidenti arasında telefon zəngi olacaq. Dünən isə İsrail və Türkiyə baş nazirləri ortaq bəyanat verdilər. Belə demək mümkündürsə Türkiyənin əsas problemləri gündəmdən çıxır. Bu zəmində Türkiyənin Avropa dövlətləri ilə münasibətləri də xeyli yaxşılaşacaq. Türkiyəyə qarşı indiyə qədər təkləmə siyasəti aparıblar. Güman edirəm ki, bundan sonra Avropa dövlətləri ilə münasibət yüksələn xətt üzrə inkişaf edəcək.
Bizə yaxın coğrafiyada pozitiv hadisələr baş verir. Bu hadisələrin Azərbaycan mütləq müsbət təsiri olacaq".
Səxavət Məmməd
