"Terroru maliyyələşdirmək üçün Fransa, ABŞ, Almaniya çoxlu pul xərcləyiblər"

Fransanın Nitsa şəhərində terror aktı törədilib, nəticədə 80-dan çox insan ölüb, 120 nəfər xəsarət alıb.

Terror aktının olacağı barədə əvvəlcədən Fransa xüsusi xidmət orqanlarında məlumat olub. Bundan əlavə Türkiyədəki Fransa səfirliyi və baş konsulluğu öz fəaliyyətini növbəti bir əmrə qədər bağladığını elan etmişdi. Amma Fransa dövlətinin xəbəri olduğu halda bu terror aktı baş verdi.

Nitsada törədilmiş terror aktına görə məsuliyyəti İŞİD terror təşkilatı öz üzərinə götürüb.

Baş verən terror aktını millət vəkili Araz Əlizadə Ölkə.az-a verdiyi açıqlamasında şərh edib:

"Terrora qalib gəlmək üçün onun maliyyəsini dayandırmaq lazımdır. Terroru maliyyələşdirmək üçün Fransa, ABŞ, Almaniya çoxlu pul xərcləyiblər. ABŞ və Avropa dövlətləri Yaxın Şərqdə sabitliyi pozmaq üçün terror təşkilatları yaradıblar, onları maliyyələşdirib, silahlandırıblar. Qərb Yaxın Şərqə özünün qulu kimi baxırdı. Yaxın Şərqdə elə liderlər var idi ki, Qərbə "yox" deyə bilirdilər. Hüsni Mübarək, Qəddafi ABŞ-a, Avropaya yox deyə bilirdilər. O zaman ABŞ-ın dövlət katibi olan Hillary Clinton qərar verdi ki, həmin liderləri aradan götürüb bu dövlətlərə öz adamlarını rəhbər qoysunlar. Nəticədə Yaxın Şərqi viran qoydular. Talibanı ABŞ yaratmışdı, ancaq sonradan idarədən çıxıb onların özlərinə qarşı çevrildi. Taliban itaətdən çıxıb, müstəqil siyasət yeritməyə başladı. Qərb öz başına bəla açdı.

"Charlie Hebdo" jurnalının redaksiyasında qətliam baş verəndə terroru törədən təşkilat bildirdi ki, peyğəmbəri təhqir etdikləri üçün bunu ediblər. Fransa prezidenti dedi ki, Fransada söz azadlığıdır. Bütün Avropa liderləri küçələrə çıxdılar və dedilər, "mən “Charlie Hebdo”yam". Bu məsələni sakitləşdirmək əvəzinə daha da qızışdırdılar. Bu terror aktlarında ən pis şey odur ki, terror aktları o dövlətlərin başçılarına qarşı yox, günahsız insanlara qarşı həyata keçirilir.

Terroru doğuran səbəb dünyada olan ədalətsizlikdir. ABŞ deməsə idi ki, Bəşər Əsəd ya istefa versin, ya da biz onu aradan götürəcəyik, Suriyada o hadisələr olmazdı, İŞİD yaranmazdı. Demokratiya çox şirin sözdür, ancaq ondan alət kimi istifadə edirlər. Güclü dövlətlərin əlində iki silah var, biri "demokratiya" sözüdür, biri də "insan haqları".

Səxavət Məmməd
Ölkə.Az