\"Rusiya ilə Türkiyə birlikdə İŞİD-i qısa müddətdə sıradan çıxara bilər\"

İŞİD-in növbəti hədəfi Rusiyadır. Terror təşkilatı tərəfdarlarını Rusiyaya qarşı cihada çağırıb. İŞİD terror təşkilatı xəbər yayıb ki, Rusiyada bütün obyektlər terror təhlükəsi altındadır.

Bundan sonra Rusiyanın hansı addımlar atacağı maraqla gözlənilir. Bir müddət öncə hərbi təyyarələrini Suriyadan geri aparan Rusiya yenidən İŞİD-i bombalayacaqmı? Bundan əlavə Türkiyə və Rusiya prezidentlərinin görüşü zamanı İŞİD-ə qarşı birgə mübarizə aparılacağı barədə razılığın əldə olunacağı gözlənilir.

Bütün bu proseslərlə bağlı politoloq Qabil Hüseynli Ölkə.Az-a danışıb:

"Suriyadan Rusiyanın geri çəkilməsi mümkün deyil. Onsuz da Rusiya mətbuatında yayıldığı kimi İŞİD bəzi Avropa ölkələrini və Rusiyanı hədəf kimi seçib. ABŞ-la Rusiya İŞİD-ə qarşı apardığı mübarizədə müəyyən razılaşmalar əldə edib.

Son dövrlərdə Türkiyənin Suriya Azadlıq Ordusunu dəstəkləməkdən vaz keçməsi ona gətirib çıxardı ki, Suriya prezidenti Bəşər Əsəd bütün müxalifətə, əsasən də Suriya Azadlıq Ordusunun bütün üzvlərinə əfv elan etdi. Onların təslim olduğu halda barələrində cinayət işinin qaldırılmayacağını bəyan etdi. Bütün bunlar Türkiyənin həm Suriyaya qarşı mübarizə taktikasının, həm də İŞİD-lə bağlı məsələdə mövqeyinin müəyyən qədər dəyişməsinə gətirib çıxardı. Rusiya ilə Türkiyə arasında İŞİD-ə qarşı birgə hərbi əməliyyatlar aparacaqları haqda razılığın olması barədə məlumatlar var. Rusiya Türkiyə ilə birlikdə İŞİD-ə qarşı mübarizəyə başlayır.

Qərblə Türkiyə arasında münasibətlər soyuyub, İraqın isə İŞİD-ə qarşı mübarizəsi xeyli zəifləyib. Bu günlərdə İŞİD-ə qarşı döyüşməkdən imtina edən 100 min İraq əsgəri ordudan xaric edildi. Bu çox böyük qüvvədir. Bu eyni zamanda İraq cəmiyyətində aşağı əhval-ruhiyyənin göstəricisidir.

Meydan hazırda boşdur. İŞİD-in bütün strukturlarını havadan zərbələr endirməklə məhv etmək mümkündür. Rusiya ilə Türkiyə arasında müəyyən razılaşma əldə edilsə, qurudan əməliyyatları Türkiyə öz üzərinə götürəcək. Beləliklə, bu iki dövlət birlikdə İŞİD-i çox asanlıqla sıradan çıxara biləcəklər. Hazırda İŞİD-in elə bir gücü, qüvvəsi qalmayıb.

İŞİD-ə qarşı mübarizədə Suriya ordusu fəal iştirak edir. Hətta Suriya Azadlıq Ordusunun müəyyən qüvvələri də İŞİD-ə qarşı mübarizədə iştirak edir. Yaxın vaxtlarda böyük ehtimalla "həftəbecər" bir koalisiya yaranacaq. Bu koalisiyaya Rusiya, Türkiyə, Suriya, Suriya Azadlıq Ordusu və YPG daxil ola bilər. Bu koalisiya İŞİD üzərində qələbə çala bilər. İŞİD-ə qarşı son zaman müxtəlif siyasətlər həyata keçirilib. İŞİD-i yaşadan və manevr qabiliyyətini artıran cəhətlərdən biri də budur. Rusiyanın Suriyada 1200-dən çox desant dəstəsi var. Rusiya İŞİD-ə qarşı həmin qüvvələrdən də istifadə edə bilər.

İŞİD-in Rusiyanı terrorla hədələməsi söz-söhbətdən başqa bir şey deyil. Çeçenlər bununla bağlı müəyyən planlar qura bilər. Onların da hamısı haqqında məlumatlar Rusiya kəşfiyyat orqanlarının əlindədir. Rusiya sərhədlərində güclü yoxlama proseduru həyata keçirir. Hesab edirəm ki, İŞİD-ə qarşı yaranacaq bu dəfəki koalisiya uğurlu ola bilər".

Səxavət Məmməd
Ölkə.Az