"Ermənistan sülh istiqamətində hansısa bir addım atmağa hazır deyil"

ATƏT-in Minsk qrupunun həmsədrləri Azərbaycan və Ermənistan prezidentlərinin Paris görüşündən gözləntilərini açıqlayıblar. Həmsədrlər Azərbaycan və Ermənistan prezidentlərinin Paris görüşünü şərh edərkən sülh sazişinin əsas məqamları üzərində ciddi müzakirələr gözlədiklərini bildiriblər. Görüşdən sülh sazişinin imzalanmasını gözləmək olarmı?

Ölkə.az bu sualı millət vəkilləri Asim Mollazadə və Yevda Abramova yönəldib:

Asim Mollazadə: "Mən gözləmirəm ki, Ermənistan sülh istiqamətində hansısa bir addım atmağa hazır ola bilsin. Ola bilər ki, heç bir mahiyyəti olmayan bir bəyanatı imzalasın, amma hər hansısa ciddi bir bəyanat imzalamağa gəldikdə, ermənilər mütləq boyun qaçırdacaqlar. Mən xatırlatmaq istəyirəm ki, Fransa prezidentinin təşəbbüsü zamanı da Ermənistan müxtəlif yollarla vəziyyətdən boyun qaçırmışdı. Ona görə də, mən heç bir sülh sazişi gözləmirəm".

Yevda Abramov: "ATƏT çox şey deyə bilər. Mənə belə gəlir ki, sülh sazişinin imzalanması hələ tezdir. Ermənistan o dərəcədə konsturiktiv deyil ki, birdən birə sülh sazişi bağlasın. Ola bilər ki, tərəflər arasında əvvəlki görüşlərdən fərqli olaraq prinsipial məsələlərdə razılıq ola bilər. Sülh sazişinə gedən yolda bir addım irəliyə gedilə bilər, amma sülh sazişindən qətiyyən söhbət gedə bilməz. Bu 21 ildə neynəyiblər ki, birdən birə bu qənaətə gəlsinlər? Dünyada baş verən hadisələr onu göstərir ki, burada inanılası bir şey yoxdur. Ümumilikdə yalnız indiyə qədər razılığa gəlinməyən məsələlərdə ortaq məxrəcə gəlmək olar. Ona görə, bu danışıqlarda hardasa torpaqların geri qaytarılması, Qarabağ probleminin sülh ilə yekunlaşmasını mümkün olan şey sanmıram. Uzaqgörən diplomat, siyasətçi, politoloq heç vaxt bunu belə deməz. Gözləntilərimiz çox olsada, hələlik Azərbaycan cəmiyyətini sevindirəcək və Qarabağ problemini tam həll edəbiləcək addım atılmayacaq. Amma hamımız səbrsizliklə gözləyirik, təki elə olsun".

Qeyd edək ki, ATƏT-in Minsk qrupunun həmsədrləri tərəflərin Dağlıq Qarabağ münaqişəsinin sülh yolu ilə həllini etibar etdiyi yeganə format olduğunu bildiriblər. Azərbaycan və Ermənistan rəhbərlikləri isə həmsədrlərin səylərini dəstəklədiklərini ictimai şəkildə bəyan ediblər.

Fatimə İbrahimova
Ölkə.az