Tural Abbaslı: "Başqanın atdığı addımlardan narazıyam"

"Müsavat" partiyasında narazılar fraksiya yaradır. Məlumata görə, seçkidən əvvəl və seçkidən sonra baş verənlərlə bağlı Qubad İbadoğlu MNTK-ya şikayət ərizəsi verib.

Bu məsələləri "Müsavat" partiyasının məclis üzvü Tural Abbaslı Ölkə.az-a şərh edib.

Tural Abbaslı: "Saxtakarlıq və Mərkəzi Nəzarət Təftiş Komissiyasına (MNTK) verilən şikayətlərlə bağlı bir tərəfin, yəni Qubad İbadoğlunun etirazları var və Qubad bəyin tərəfdarları sənəd hazırlayıb. Seçkidən öncə və seçkidən sonrakı prosseslərdən şikayət hazırlayıblar və MNTK-ya təqdim ediblər. MNTK yaxın günlərdə buna hüquqi qiymət verməlidir. Bu məsələdə mənim şikayətim olmayıb. Şikayətim olmadığı üçün də MNTK-ya heç bir şikayət ərizəsi verməmişəm. Seçkini, seçkinin nəticələrini və seçki prosesini qəbul etmişəm. Partiya daxilində fraksiyalaşmanın, daxili müxalifətin tərəfdarıyam ona görə ki, qurultaydan bu yana partiyanın idarə edilməsindən, partiyanın yönləndirilməsindən, partiya başqanının partiya daxilində tutduğu mövqeyindən və onun atdığı addımlarından narazıyam. Biz müsavatçıyıq, "Müsavat" partiyası hamımızındır, başqan kimin olmasından aslı olmayaraq, başqanlar gəlir, gedər ancaq Müsavat, vu tutuğumuz yol, əqidəmiz qalacaq. Biz partiyamıza şəxslərə, başqanlara görə münasibət bəsləmirik. Əgər bizim nəyəsə etirazımız varsa və nəyisə bəyənmiriksə, biz bunu açıq şəkildə səsləndirəcəyik və bu bəyənmədiyimiz, etirazımız olan məsələlərin aradan qaldırılması üçün real addımlar atacağıq. Bu nizamnamənin bizə verdiyi hüquqdur. Bu partiya nizamnaməsinə heç bir halda zidd deyil. Bu barədə partiya daxilində narazı olan insanlarla danışıqlar aparırıq. Bizim istədiyimiz alınsa, əslində Azərbaycan hakimiyyətinə də nümunə olacaq. Biz Azərbacan hökümətindən alternativlik tələb edirik. Parlamentdə parlament daxili müxalifətin olmasını, MSK üzvlərinin də düzgün əsaslarla bölünməsini istəyirik. Biz avtoritarizmin əleyhinəyik və ona görə də partiya daxilində bunu göstərmək yaxşı olacaq. Nəzərə alsaq ki, bugünki başqan qurultay nümayəndələrinin yarısının səsini yığıb, digər yarısı ona səs verməyiblər. Qurultayın qərarıdır, başqanın atdığı addımları bəyənilmədiyində ona etiraz bildirməlidir. Fraksiya sırf bununla bağlıdır. Fraksiya yaradaraq partiyanı parçalamaq, onun işində iştirak etməmək kimi bir fikrimiz yoxdur. Bir müsavatçı kimi partiyanın verdiyi tapşırıqlara təbii ki, tabe olacam. Çünki qurultayın qərarına hörmətlə yanaşıram. Amma nizamnamənin də mənə verdiyi hüquqdan istifadə edib istənilən məsələyə öz etirazımı bildirəcəm".

Səxavət Məmməd

Ölkə.az