Müsavata daha bir zərbə

Müsavatda partiya daxilində başqan seçkisiylə başlayan narazılıqlar artıq pik həddə çatıb. Narazılar Müsavatda fraksiya yaratmaq qərarına gəliblər.

Müsavat partiyasında başqandan narazılar, fərqli düşüncə sahibləri fraksiya yaratmaq qərarına gəliblər. Əvvəla gəlin, görək fraksiya nə deməkdir və bu hal Müsavatı nə ilə üz-üzə qoya bilər. Fraksiya hissə və mütəşəkkil qrup anlamına gəlir. Bu partiyada ayrıca qrupu demokratik təzahürlərdən biri hesab edənlər də var, əksinə təşkilat daxilində monolitliyə zərbə vuran, tərəfdarları ilə parçalanmaya səbəb ola biləcəyini düşünənlər də. İndiki halda ikinci fikir daha ağlabatan görünür. Çünki fraksiya yaradılmazdan əvvəl də Müsavatda qopmalar başlamışdı, əvvəlcə gənclər, ardınca isə partiyanın Tovuz təşkilatının 400-dən artıq üzvü bütünlüklə istefa ərizəsi yazdı. Bu qədər üzvün qəfl istefaya getməsində əli olduğu söylənilən, əslən tovuzlu Vurğun Əyyub və onun başqan seçkisində dəstəklədiyi Qubad İbadoğlu və başqana cüzi səslə uduzan daha bir keçmiş namizəd Tural Abbaslı Müsavatın fraksiyasının yaradılması üçün danışıqlara başlayıblar. İdeya Tural Abbaslıdan gəlib və təsis ediləcəyini təqdirdə fraksiyanı Müsavat partiyası üzvlərinin ən azı yarısının dəstək verəcəyini düşünür.

Müsavatçı Tural Abbaslının sözlərinə görə, başqan seçkiləri zamanı yeni başqan cüzi səs fərqi ilə qalib gəlib: “Bu o deməkdir ki, partiyanın yarısı başqa cür düşünür. Yaranmış situasiya və həmin situasiyaya uyğun addım atmağı düşünən və nisbətən fərqli düşünən insanların birliyi kimi nəzərdə tutulub”.

Seçki zamanı yol verilən pozuntularla bağlı partiyanın nəzarət təftiş komisiyasının rəyinin obyektivliyinə şübhəsi olan Qubad İbadoğlu fraksiyaya qoşulmaq qərarını yaxın vaxtlarda verəcək.

Onmun sözlərinəı görə, partiyada fəaliyətlərini davam etdirəcəklər.

Arif Hacılının başqanlığı ilə barışmayan müsavatçı Səxavət Əlisoy fraksiya yaradılması qərarına normal yanaşır, düşünür ki, partiyada siyasi narazılıq varsa, fraksiya yaradılması labüddür. Onun adaşı, Müsavat başqanın müavini Səxavət Soltanlı isə fraksiya yaratmaq iddiasını hakimiyyətin marağında olan məsələ adlandırıb. Başqan Arif Hacılı bu gün keçirdiyi mətbuat konfransında deyib ki, Müsavat nizamnaməsində fraksiya yaradılması nəzərdə tutulmur və partiyanın maraqlarına uyğun deyil: “Kimlər fraksiya fəaliyyəti niyyətinə düşəcəklərsə, partiya üzvlərinin qarşısında bir qədər də nüfuzdan düşəcəklər”.

Başqan seçkilərinin demokratik keçdiyini vurğulayıb. Qurultayın bitdiyini xatırladan Arif Hacılı söz-söhbətlərin də yekunlaşmasını arzu edir. O, heç kəsin Müsavatdan getməsinin tərəfdarı deyil. Bununla da, o, kimlərisə, partiyadan uzaqlaşdırılacağı ilə bağlı həm də xəbərdar edib. (ANS TV)

Ölkə.Az