Deputatdan təklif: "Ehtiyatda olan generallar cəbhə bölgəsindəki rayonlara icra başçısı təyin olunsun"
YAP icra katibinin müavini, deputat Siyavuş Novruzov Milli Məclisin bu gün keçirilən plenar iclasında ehtiyatda olan generalların cəbhə bölgələrdəki rayonların İcra Hakimiyyətlərinin başçısı təyin etmək təklifini irəli sürüb.
Ölkə.Az-ın APA-ya istinadən məlumatına görə, “Hərbi vəziyyət haqqında” qanun layihəsinin müzakirəsi zamanı çıxış edən S. Novruzovun belə təcrübənin yaşandığını bildirib: “Vaxtı ilə Heydər Əliyev ehtiyatda olan generalları icra başçısı təyin edirdi. Məhz cəbhə bölgəsinə və yaxud müharibə gedən rayonlarda belə təyinatlar olurdu. İndi də bizim ehtiyatda olan, dövlətinə sadiq xeyli generalımız var. Bu praktikanı yenidən tətbiq etməliyik”.
“Dondurulmuş münaqişə odur ki, hər an müharibə alovlana bilər. Aprel döyüşləri də bunu göstərdi. Ona görə də biz hər an hazırlıqlı olmalıyıq”.
***
Ölkə.Az-ın “Report”a istinadən xəbərinə görə, bunu Milli Məclisin bu gün keçirilən plenar iclasında parlamentin İctimai birliklər və dini qurumlar komitəsinin sədri, hakim Yeni Azərbaycan Partiyası icra katibinin müavini Siyavuş Novruzov deyib .
O bildirib ki, Azərbaycanda kifayət qədər ehtiyatda olan hərbçi var, lazım olarsa, onlardan da istifadə etmək olar.
S.Novruzov qeyd edib ki, 1990-cı illərdə vətənpərvərlər ermənilərin qarşısında dayanıb, müqavimət göstəriblər: “Belə olmasaydı, ermənilərin Kür çayına qədər gəlib çıxacaqdılar. Bu mənada Səfərbərlik və Hərbi Xidmətə Çağırış üzrə Dövlət Xidməti müəyyən yaş həddində olan insanları siyahıya almalıdır. Sonra bunlara təlim keçməlidirlər. Əsas döyüşləri elə müqavilə əsasında çalışanlar aparır. 18 yaşına çatanlar isə xeyli təcrübə keçməlidirlər”.
O vurğulayıb ki, mətbuatda ordu ilə bağlı gedən yazılara ciddi nəzarət olmalıdır: “Düzdür, nəzarət var, amma bəzi xaricdən idarə olunan media orqanları məlumatlar yayırlar. Bunun da qarşısı alınmalıdır. Müharibə şəraitində olan ölkədə ordu ilə bağlı xəbərlər yalnız Müdafiə Nazirliyinin yaydığı kimi olmalıdır”.
