"Səfirin qətlinə ciddi hazırlıq görülüb"

Rusiyanın Türkiyədəki səfirinə qarşı törədilən terror aktı dünyanın gündəmini dəyişdi.

Bəzi ekspertlər bu terror aktının Rusiya ilə Türkiyənin münasibətlərinə xələl gətirmək məqsədilə təşkil edildiyini bildirir. Terror aktının arxasında Fətullah Gülənin və Qərb xüsusi xidmət orqanlarının olduğu da iddia edilir. Ancaq görünən odur ki, baş verən qətl hadisəsi Rusiya və Türkiyəni bir-birinə yaxınlaşdırır və tərəflər birgə anti-terror əməliyyatları keçirə bilər.

Bu hadisədən sonra bölgədə proseslərin necə cərəyan edəcəyi məsələsi əsas sual kimi görünür.

Türkiyədə baş verən terror aktı və hadisənin Rusiya-Türkiyə münasibətlərinə təsirini politoloq İlqar Vəlizadə Ölkə.Az-a şərh edib:

"Bundan sonra nələrin baş verəcəyini söyləmək çətindir. Bütün hallarda baş verən terror aktı Rusiya-Türkiyə münasibətlərinə təsir edəcək. Söhbət terrorçulara qarşı birgə mübarizədən gedir. Terror aktı həm Rusiya, həm də Türkiyə dövlətinə qarşı da törədilib. Bu o deməkdir ki, əslində həm Rusiya, həm də Türkiyə terrorun hədəfidir. Terror aktının arxasında dayanan qruplar, siyasi dairələr həm Türkiyəni, həm də Rusiyanı hədəf kimi götürüb. Ona görə də bu ölkələri həm terror, həm da regionda gedən proseslərə qarşı birgə çalışmağa məcbur edəcəklər.

Əslində 2017-ci ilin birinci rübündə Rusiya prezidenti Putinin Türkiyəyə rəsmi səfəri gözlənilirdi. Bu terror aktı planlaşdırılan səfərə kifayət qədər maneçilik törədir. Çünki, Andrey Karlov qırıcı böhranından sonra Türkiyə-Rusiya yaxınlaşmasının belə desək memarlarından biridir. Andrey Karlov iki dövlətin yaxınlaşmasında böyük rol oynayırdı. Onun əvəz olunması müəyyən dərəcədə prosesə əngəllər törədəcək. Bu, terror aktı törədənlərə vaxt udmağa və əks-plan hazırlamağa imkan yaradacaq.

Nəticə etibarilə bu hadisə Türkiyənin daxili siyasi proseslərinə böyük təsir edəcək. Türkiyə daxilində Rusiya ilə münasibətlərin yaxşılaşmasını istəməyən qruplar var. Bu cür terror aktlarının törədilməsinə şərait və imkan yaradılacaq. Çünki Türkiyədə Rusiyanı istəməyən kifayət qədər nüfuzlu adamlar var. Çox güman ki, onlar təhlükəsizlik sisteminə yaxın olan adamlardır. Biri var, adi supermarketdə terror aktı törədəsən, biri də var ki, səfirə qarşı hazırlanmış terror aktı törədəsən. Buradan hiss olunur ki, bu adam işi tək görməyib və ciddi hazırlıq görüb. Onun arxasında yaxşı təşkil olunmuş qüvvə var".

Səxavət Məmməd
Ölkə.Az