Azərbaycan 2015-ci ildən yeni Beynəlxalq Təşkilata üzv olacaq

Standartlaşdırma, Metrologiya və Patent üzrə Dövlət Komitəsi 2015-ci il yanvarın 1-dən Qanunverici Metrologiya üzrə Beynəlxalq Təşkilatın (OIML – Organisation International de Métrologie Légale) üzvü statusunu alacaq

Bu barədə Dövlət Komitəsi yanında Dövlət Metrologiya Xidmətinin rəhbəri Oqtay Abbasov mətbuat konfransında deyib.

Onun sözlərinə görə, belə təşkilatlara üzvlük metrologiya sahəsinin və bütövlükdə ölkə iqtisadiyyatının inkişafı üçün əhəmiyyət kəsb edir.

O.Abbasovun fikrincə, beynəlxalq etalonların tanınması məqsədilə bu sahədə qanunvericilik bazasının təkmilləşdirilməsi heç də az əhəmiyyət kəsb etmir: "Etalonların qarşılıqlı tanınması sahəsində ölkələrlə sazişlərin imzalanması aparılan ölçmələrin keyfiyyətini təmin etməyə imkan verir ki, bu da öz növbəsində, yüksək keyfiyyətli məhsul istehsalına yardım edir".

Bu təşkilatlara üzvlük Metrologiya konvensiyasına qoşulmaq və milli ölçü etalonlarının və milli metroloji institutlar tərəfindən verilən kalibrləmə və ölçmə sertifikatlarının qarşılıqlı tanınması haqqında sazişin imzalanması üçün əsasdır ki, bu da Azərbaycanın kalibrləmə sertifikatlarının beynəlxalq səviyyədə tanınmasını bildirir.

Noyabrın 18-20-də Versalda Çəkilər və Ölçülər üzrə Baş Konfransın hər 4 ildən bir təşkil olunan 25-ci iclası keçiriləcək və Azərbaycanı konfransda yeni üzv kimi Standartlaşdırma, Metrologiya və Patent üzrə Dövlət Komitəsi təmsil edəcək.

Qanunverici Metrologiya üzrə Beynəlxalq Təşkilat isə ticarətdə texniki maneələrin aradan qaldırılması üçün üzv dövlətlərdə ölçmə vasitələrinə dair hüquqi norma və qaydaların beynəlxalq tələblərə harmonizasiyası məqsədilə 1955-ci il Konvensiyası əsasında yaradılıb. Təşkilatın əsas funksiyaları qanunverici metrologiyanın ümumi prinsiplərini müəyyən etmək, müxtəlif dövlətlərdə mövcud olan ölçmə vasitələri ilə bağlı hüquqi tələblərə dair məlumatları ümumiləşdirmək, qanunverici metrologiya sahəsində mövcud tələbləri beynəlxalq qanunvericiliyə harmonizə etmək, metrologiya üzrə vahid model qanunlar qəbul etmək və s. məsələləri əhatə edir. Müxbir üzvlər Qanunverici Metrologiya üzrə Beynəlxalq Təşkilatın texniki işində, təşkilatın əsas qurumu olan Qanunverici Metrologiya üzrə Beynəlxalq Komitənin iclaslarında müşahidəçi kimi iştirak etmək və müvafiq sənədlərlə tanış olub onlara şərh vermək hüququna malikdirlər.

Qanunverici Metrologiya üzrə Beynəlxalq Təşkilatın 60 tamhüquqlu (Avropa İttifaqının üzv dövlətləri, həmçinin Rusiya, Türkiyə, Qazaxıstan, İran, Çexiya və s.), 67 müxbir üzvü (Estoniya, Gürcüstan, Litva, Latviya, Moldova, Ukrayna, Özbəkistan və s.) var.(Trend)

Ölkə.Az