“Terror təşkilatları dolayı yolla ABŞ tərəfindən dəstəklənir”

 

Bu sözləri tanınmış politoloq Arzu Nağıyev Ölkə.Az saytına deyib. Onun fikrincə, Türkiyə NATO-nun üzvü olan ən böyük müsəlman dövləti olduğuna görə də, NATO-nun üzvü kimi ABŞ, Türkiyədən heç vaxt imtina etməz.

 

“Suriya-İraq məsələsinə gələndə, Türkiyə Rusiya ilə nə qədər yaxınlaşdıqca, Amerika bunu qısqanclıqla qarşılayır. Lakin Obama hakimiyyəti artıq iqtidarı təhvil verməlidir. Ona görə də, onlar özündən sonra hansısa düşmən mövqelər yaratmaq fikrində deyil. Düşünürəm ki, Obama administrasiyası özündən sonra buraxdığı səhvləri bərpa etməyə çalışır. Düşünmürəm ki, Trampın dövründə ABŞ-ın Yaxın Şərqə görə xarici siyasəti dəyişsin. Təbii ki, seçiləcək dövlət katibindən də böyük işlər asılıdır. Suriya və İraq məsələsi hələ sona çatmayıb. Hələ Rusiya ilə Türkiyənin hansısa məsələni həll etməsi o demək deyil ki, onlar bütün Suriyaya nəzarət edə bilərlər. Orada müxtəlif terror təşkilatları var ki, dolayı yolla ABŞ tərəfindən dəstəklənir. Türkiyədə Kürdüstan dövləti yaradılması kimi böyük problemi var. İran, Bu dövlətin atom məsələsi var. İranla Türkiyənin münasibətləri heç vaxt müsbət məcraya yönəlməyib və yönəlməyəcək”.

 

Ekspert düşünür ki, bütün proseslər baxımından ABŞ çalışacaq ki, daima Türkiyəyə dəstək olsun. Məhz buna görə, A. Nağıyev deyir ki, İncirlik hərbi bazası həmişə fəaliyyət göstərəcək:

“Yaxın zamanda Qazaxıstanda keçiriləcək görüşdə bir sıra məsələlər aydınlaşacaq. Bu zaman da, Türkiyə öz təlimatlarını ABŞ-a verəcək. İnandırıcı deyil ki, İncirlik hərbi bazası ya Rusiya, yaxud da Türkiyə tərəfindən tam nəzarət olunur. Unutmaq lazım deyil ki, bu NATO-nun hərbi hava qüvvələrinə xidmət edən bir bazadır. Bunun bağlanma məsələsi tək Türkiy, Amerika tərəfindən həll olunmur. Bu məsələ bütün NATO üzvləri tərəfindən həll edilməlidir. Düşünürəm ki, İncirlik hərbi bazası bir sıra məsələlərə görə bağlanmaz. Eyni zamanda, Rusiyanın NATO ilə olan sərhəddinin Ermənistan-Türkiyə sərhəddindən keçməsi və başqa məsələlərə görə İncirlik bazasının bağlanması qeyri-mümkündür. Bu heç Amerikaya da sərf etməz”.

 

A. Nağıyevin fikrincə, Türkiyə balanslı siyasət yeritsə, daha çox xeyir görər:

“Türkiyə hakimiyyəti unutmamalıdır ki, Suriya məsələsindən başqa Rusiya ilə üzt-üstə düşən ümumi mövqeyi yoxdur. İstər turizm, istər iqtisadi cəhətdən bir-birinə yaxınlaşmasının qarşısını almaq üçün məhz eyni mərkəzdən idarə olunan terror aktları törədilir. Bu gün Rusiya ilə Türkiyəni bağlayan əsas məsələlərdən biri və birincisi Suriya məsələsidir. Məhz buna görə də, tək buna ümidli olub yaşamaq qeyri-mümkündür. Ona görə də, həm Rusiya ilə, həm ABŞ ilə, həm də NATO-nun digərüzvləri ilə balanslı siyasət aparmaq və qarşı-qarşıya oturub, bütün problemləri çözmək ən normal proses ola bilər. Bu gün ABŞ hakimiyyətilə Türkiyə arasındakı əsas problmelərdən biri FETÖ məsələsidir, eyni zamanda Avropa ilə miqrant məsələsində problemlər var. Düşünürəm ki, bütün bunları balanslı siyasətlə həll edilməlidir”