İran prezidenti Azərbaycana gəlir

İran prezidenti 10-a yaxın sənəd imzalayacaq

İran prezidenti Həsən Ruhani gələn həftə Azərbaycana səfər edəcək.

Bu barədə İranın telekommunikasiya naziri Mahmud Vaezi bildirib.

Məlumata görə, Həsən Ruhani Bakıya səfəri çərçivəsində ikitərəfli görüşlərin keçirilməsindən başqa, 10-a yaxın sənəd də imzalayacaq.

Vaezinin sözlərinə görə, gündəlikdə dayanan ən mühüm məsələlərdən biri Azərbaycandan elektrik enerjisinin alınmasıdır.

Bundan başqa, sərhədyanı çayların resurslarının bölünməsi, gömrük, nəqliyyat, qaz və energetika sahələrində məsələlər, turizm və iki ölkə arasında ticarət sahəsində əməkdaşlıq müzakirə olunacaq.

İranın telekommunikasiya naziri əlavə edib ki, Azərbaycan prezidenti İlham Əliyevin Tehrana səfəri çərçivəsində iki ölkə arasında münasibətlərdə müsbət atmosfer yaranıb.

Vaezi vurğulayıb ki, Ruhaninin Bakıya səfəri İran və Azərbaycan arasında mehriban qonşuluq münasibətlərinin inkişafı yolunda daha bir addım olacaq./Oxu.az/

Ölkə.Az