Araz Əlizadə: \"Ölkədəki siyasi böhran xalqın vecinə də deyil\"
Gürcüstanda siyasi böhran baş verib. Müdafiə naziri İrakli Alasaniya və xarici işlər naziri Maya Pancikidze istefa veriblər. İrakli Alasaniyanın rəhbərlik etdiyi "Bizim Gürcüstan", "Azad Demokratlar Partiyası" hakim “Gürcü arzusu” koalisiyadan çıxıblar.
Qonşu ölkədə baş verən siyasi prosesləri hazırda Tiflisdə olan ASDP sədri, tanınmış siyasətçi Araz Əlizadə Ölkə.az-a şərh edib.
Arza Əlizadə: "Hal-hazırda Tiflisin küçələrində gəzirəm və burda heç nə baş vermir. Müdafiə naziri İrakli Alasaniya və xarici işlər naziri Maya Pancikidzenin istefa verməsinin xalqa heç bir dəxli yoxdur. Xalq heç bunları müzakirə belə etmir. Bu mövzunu ancaq siyasətşünaslar və siyasətçilər müzakitə edir. Burda bir çox siyasətşünaslar deyir ki, Gürcüstanda kiçik Yanukoviçlər var və onlar Avropaya inteqrasiyanı istəmirlər.
Avropa ilə Gürcüstan iqtisadi sazişləri imzalamaqla, Gürcüstan onsuz da kasıb bir ölkədir, lap bədbəxt bir vəziyyətə düşəcək. Necə ki Ukraynanın kənd təsərüfatı məhsullarının və sairələrin Rusiyaya yolu bağlandı, eləcə də Gürcüstanın yolu bağlanacaq. Bəzi adamlar var ki, Avropa deyə qışqırır, amma unudurlar ki, düşünmək lazımdır, Avropa Gürcüstanı, Ukraynanı öz tərkibində götürürmü? Onları qəbul etməyə hazırdırmı? Avropa onları nə öz tərkibində görür, nə də onları qəbul etməyə hazırlaşmır. Sovet sisteminin dağlması üçün Avropa keçmiş sosialist respublikalarına maddi yardım edirdi, ancaq indi Avropa nə buna qadirdi, nə də bunu istəyir. Təsəvvür edək ki, Gürcüstan Avropa ilə bütün iqtisadi müqavilələri imzaladı. Sual olunur, gürcü çaxırını, gürcülərin mineral sularını, kənd təsərüfatı məhsullarını Avropa alacaqmı? Təbii ki, almayacaq.
Rusiyaya qarşı iqtisadi sanksiyaların tətbiq edilməsi üçün ən çox Polşa səs-küy salırdı. İqtisadi sanksiyalar tətbiq edilən kimi birinci Polşa başladı qışqırmağa ki, 500 milyon alma satışından itirmişik, xahiş edirik bizim alma ixracatından itirdiyimiz 500 milyonumuzu verin. "Bəxtiyar" filmindəki kontrabas çalan kimi Polşa başladı ki, "pulumu verin, pulumu verin!".
Siyasətçi ilk növbədə düşünsün, mən bu addımı atandan sonra mənim xalqım bundan nə qazanacaq və mənim dövlətim bundan nə qazanacaq. Yox əgər heç bir şey qazanmırsa, ancaq itirirsə, onda o, həmin addımı atmamalıdır".
Səxavət Məmməd
Ölkə.az