Türkiyəli nazir vəzifədən gedir?

Yıldız müxalifətin tələbini məntiqli hesab edib.

Ölkə.Az CNN Turk telekanalına istinadən xəbər verir ki, Türkiyənin təbii sərvətlər və energetika naziri Taner Yıldız Qaraman vilayətində yerləşən şaxtada baş verən qəzaya görə vəzifəsindən istefa etməyə hazırdır. Bu qəzada 18 nəfər dünyasını dəyişmiş, 2 nəfər isə itkin düşmüşdü. Taner Yıldız müxalif partiyanın onun vəzifədən getməsini tələb etməsini məntiqli hesab edib.

Nazir çıxışında qeyd edib ki, hər zaman ona tapşırılan sahə üzrə məsuliyyət daşımağı özünə borc bilib və özünə aid vəzifələri yerinə yetirməyə çalışıb.

Qeyd edək ki, Qaraman vilayətinin Ermenek rayonunun Pamuklu kəndində yerləşən şaxtada baş verən qəzada ən azı 18 fəhlənin yerin altında qaldığı bildirilmişdi. Hadisəyə səbəb mədən ocağındakı suyun keçidləri basması göstərilmişdi.

Rəşid Mustafazadə

Ölkə.Az