Putin sammitdən öncə nə dedi?

Putin: "Mənə elə gəlir ki, bu faydasızdır"

Ölkə.Az xəbər verir ki, Rusiya federasiyasının prezidenti Vladimir Putin TASS agentliyinə müsahibəsində "Böyük iyirmiliyin" (G-20) sammitində Rusiyaya qarşı tətbiq edilən sanksiyalarla bağlı məsələ qaldırmayacağını bildirib. Vladimir Putin 15-16 noyabr tarixində Avstraliyanın Brisben şəhərində keçiriləcək sammitdə Rusiya əleyhinə sanksiyalar mövzusunu qaldırmaq fikrində olmadığını söyləyib:

"Əlbəttə, əgər bu barədə söz düşərsə, mən danışacam, lakin bu məsələləri müzakirəyə çevirmək fikrində deyiləm. Mənə elə gəlir ki, bu faydasızdır. Nə üçün mən buna diqqət yetirməli, kimdənsə xahiş etməliyəm?", - deyə, Putin bildirib.

Onun sözlərinə görə, bu sanksiyaları tətbiq edənlər nə etdiklərini anlayırlar.

"Bu əlbəttə bizə müəyyən itkilər verir, lakin onlar üçün də bu ziyandır. Çünki bu beynəlxalq iqtisadi əlaqələr sisteminə zərbə vurmuş olur. Mən çox ümid edirəm ki, nəticə olaraq bu aydın olacaq və keçmişdə qalacaq", - deyə, Putin əminliklə vurğulayıb.

Rəşid Mustafazadə

Ölkə.Az