"Əli Kərimli onun ölümündən siyasi şou yaradır"

Bununla bağlı Ölkə.az saytı BAXCP sədrinin müavini, QHT sədri Niyaməddin Orduxanlının fikirlərini öyrənib. Onun sözlərinə görə, 2 gündür mətbuatda və sosial şəbəkədə Əli Kərimli dayanmadan Mehman Qələndərov adlı bir şəxsin ölüm hadisəsindən yazır və baş vermiş hadisəni siyasiləşdirməyə cəhd edir: “Şəxsən mən bu günə qədər belə bir şəxsin olduğunu eşitməmişdim. İlk dəfə olaraq Əli Kərimlidən eşitdim. Özü də yazır ki, heç bir siyasi partiyanın üzvü olmayan, məşhur bloger Mehman Qələndərovun ölümündə müəmmalar var. İndi Əli Kərimlidən soruşuram, heç bir siyasi təşkilatın üzvü olmayan Mehman Qələndərov necə “siyasi məhbus” ola bilər?! Bunun özü absurd deyil? Adam gərək hansısa bir siyasi təşkilatın üzvü ola və onun siyasi baxışlarına görə təqib olunduğu ortaya çıxa. Mən 20 ildən artıqdır ki, siyasi fəaliyyətlə məşğul oluram və hər kəs də bilir ki, bir siyasətçi kimi sosial şəbəkədən , internetdən və "Facebook" sosial şəbəkəsindən çox geniş istifadə edirəm. Bir dəfə də olsun sosial internetin dünyasını dəyişmiş şəxsin hər hansı bir yazısını blok etdiyini görməmişəm. Hardadır onun blogu?! Əli Kərimli yazsın baxaq görək ki, bugünə qədər hansı blog yazıları yazıb”.

Baş vermiş hadisədən sonra dünyasını dəyişmiş Mehman Qələndərovun "Facebook" səhifəsinə nəzər yetirdiyini bildirən Niyaməddin Orduxanlının sözlərinə görə, bu adamın son statuslarına diqqət etdim və şahidi oldum ki, Mehman bəyin özünun maddi sıxıntısı olması və maddi borcunun olmasına dair də yazılar paylaşıb: ”Bunu onu yaxından tanıyan insanlar da yazıb ki, xeyli borcu var. Dəfələrlə başqa ölkələrdə yaşamağa gedib. Bütün bunlar faktdır. Sadəcə ortada bir reallıq var ki, Əli Kərimli rəhmətli Mehman bəyin ölüm hadisəsindən “siyasi şou” yaratmağa cəhd edir. Azərbaycan dövlətinin dünyada imicini korlamaq istəyir. Guya bu adam həbsxanada intihar etmədiyini və bunu həyatına qəsd olunduğu görüntüsünü yaratmaq istəyir. Çox gülünc bir iddiadır. 5 nəfər siyasətçi tapa bilmərsiniz ki, Mehman Qələndərovu tanısın. Belə bir adam indiki hakmiyyətə niyə təhlükə törədir ki? Məncə, çox gülməli bir iddadır. Göründüyü kimi, Əli Kərimli hakimiyyətə şər və böhtan atır və Azərbaycan dövlətinin nüfuzuna zərbə vurmağa cəhd edir. Bu adam Mehman Qələndərov adlı şəxsin ölümündən də çirkin siyasəti üçün istifadə edir".