"Bir tərəfin mövqeyini müdafiə etmək Rusiya kimi böyük dövlətə yaraşmır"

İddia edilir ki, Rusiya Ali Məhkəməsi ÜAK-ın bağlanması barədə qərar çıxara bilər.

Məsələ ilə bağlı Diaspora Komitəsi bəyanat səsləndirib. Bəyanatda deyilir ki, Dövlət Komitəsi bəzi qüvvələrin bilavasitə Azərbaycan-Rusiya münasibətlərini zədələməyə yönəlmiş məqsədyönlü fəaliyyətindən dərin narahatlıq hissi keçirdiyini bir daha bəyan edərək, məhkəmənin ədalətli qərar verəcəyinə inandığını ifadə edir. ÜAK-ın fəaliyyətinin dayanması iki ölkənin ümumi mənafelərinə tamamilə ziddir və yalnız Azərbaycan-Rusiya strateji tərəfdaşlığının əleyhinə olan qüvvələrin maraqlarına xidmət edə bilər.

Baş verənlərlə bağlı politoloq Qabil Hüseynli "Ölkə.Az"-a danışıb:

"Baş verənlər Rusiyanın növbəti qərəzli addımı ola bilər. Çünki bu vaxta qədər Rusiya Azərbaycana qarşı xeyli qərəzli, beynəlxalq hüquq normalarına sığmayan addımlar atıb. Buraya rus və erməni ordularının birləşdirilməsi haqqında qərarı, sonra isə pulsuz olaraq Ermənistana xeyli miqdarda silah-sursat ötürməsi, Ermənistan ərazisindəki qoşunlara təlimlərin keçirilməsi və digər məsələlər aiddir. Bütün bunlar ona dəlalət edir ki, Bakı ilə Moskva arasında münasibətlər xeyli gərgindir. Bu gərginliyin səbəbi Azərbaycan tərəfində deyil. Azərbaycan hər vasitə ilə Rusiya ilə qonşuluq, bərabər hüquqlu tərəfdaşlıq münasibətlərini qoruyub möhkəmləndirməyə çalışır. Rusiya tərəfi hər dəfə bəyanat verəndə iki dövlət arasında strateji tərəfdaşlığın, qonşuluq münasibətlərinin yaxşı olduğunu deyirlər. Ancaq işə gəldikdə ATƏT-in Minsk qrupunun həmsədr dövlətlərindən biri kimi Rusiya danışıqlar prosesinə kilid vuran, danışıqlar prosesini inhisara alan, bir növ Ermənistanı təlimatlandıran dövlətə çevrilib.

Uzun müddətdir ki, danışıqlar prosesi dalana dirənib. Bu prosesdə hər hansısa irəliləyiş nəzərə çarpmır. Erməni tərəfinin hərbi ritorikası xeyli artıb. Azərbaycanın ünvanına təhdid edici, hətta lovğa, təkəbbürlə dolu fikirlər səsləndirirlər. Bu isə Rusiyanın dəstəyi olmadan mümkünsüzdür".

Ümumrusiya Azərbaycanlıları Konqresinin bağlanmasının iki dövlətin münasibətlərinə vura biləcəyi zərbə ilə bağlı politoloq bildirdi ki, bu addım atılarsa anlaşılmaz bir şey olacaq:

"Rusiyada post-sovet ölkələrinin demək olar ki, hamısının təşkilatları var. Bu təşkilatların hamısı normal fəaliyyət göstərir. Ermənilərin Rusiyada bir neçə təşkilatı yaradılıb. Hətta qondarma Dağlıq Qarabağ respublikasının nümayəndəliyi də orada fəaliyyət göstərir. Moskvada 9 may parad günündə onlar özlərini gözə soxmaq üçün, ona bayraq deməyək, cındır əskiləri ilə Qızıl meydanda meydan sulayırdılar. Bütün tərəflərə münasibətdə bir tərəfin mövqeyini müdafiə etmək Rusiya kimi böyük dövlətə yaraşmır. Rusiya sanki münasibətləri soyuqlaşdırmağa doğru addımlar atır. Bunun nəticəsidir ki, Azərbaycan-Rusiya münasibətlərində yeni bir mərhələ formalaşmaqdadır. Putin bu yaxınlardakı çıxışında bildirdi ki, tərəflər təzyiq, müharibə ritorikasından əl çəkməlidir. Rusiya elə bir vəziyyət yaradıb ki, Ermənistan - Rusiya birləşmiş qoşunlarının komandanlığının başında duran general mayor Andranik Makaryan belə bir fikir səsləndirdi ki, əgər Azərbaycan ordusu Dağlıq Qarabağda əməliyyatlar keçirərsə, tərəddüd etmədən onlar da əməliyyatlar keçirəcəklər. Buna Rusiya tərəfi də, Azərbaycan tərəfi də susub.

Əgər məhkəmə ÜAK-nın nizamnaməsindəki guya Rusiya qanunverciliyinə uyğun gəlməyən halların olmasını bəhanə gətirərək bu təşkilatı bağlasa, bu, Rusiyanın Azərbaycana qarşı qərəzinin sərgilənməsi deməkdir".

Səxavət Məmməd
Ölkə.Az