Araz Əlizadə: "Azərbaycanın tək yolu peşakər ordu yaradıb, torpaqlarını azad etməkdir"

Böyük Britaniyanın İravandakı səfiri Ketrin Liç Krallığın Azrəbaycanda iqtisadi maraqları olduğunu, BP-nin Azərbaycana külli-miqdarda sərmayə qoyduğunu bildirib.

"Buna görə də, Britaniya höküməti Dağlıq Qarabağda hərbi əməliyyatların bərpa olunmasının və vəziyyətin gərginləşməsinin əleyhinədir", deyə britaniyalı səfir bildirib.

Böyük Britaniyanın Ermənistandakı səfirinin sözlərini ASDP-nın sədri Araz Əlizadə Ölkə.az-a şərh edib.

Araz Əlizadə: "Böyük Britaniya Azərbaycandan neft almaq istəyirdi və aldı. Əlbəttə, Britaniya istədiyini alandan sonra müharibə istəməz ki, biznes maraqlarına zərər gəlsin. ABŞ-da 2 milyondan artıq erməni əsilli seçici var. ABŞ-dakı seçkilərdə hər bir səsin böyük əhəmiyyəti var. ABŞ istəməz ki, öz erməni seçicilərini incitsin. Azərbaycan özü qərar verməlidir və işğal olunmuş torpaqlarını müharibə yolu ilə azad etməlidir.

Digər tərəfdən Rusiya da Qarabağ problemin həllində maraqlı deyil. Ona görə ki, problemi həll etmək üçün əlində geniş imkanlar olan Moskva qorxur ki, birdən problemi Azərbaycanın xeyrinə həll edər və sonra da Azərbaycan Qərbin tərəfinə keçər.

Əsrin müqaviləsi bağlanmazdan əvvəl Azərbaycan bildirməli idi ki, bizim Qarabağ problemimiz var. Problemi həll edin, nefti götürün. Bu edilmədi. Onlar əgər maraqlıdırsa Azərbaycanda müharibə olmasın, məsələni BMT-də qaldırsınlar, Ermənistana iqtisadi və siyasi sanksiyalar tətbiq etsinlər. Necə olur ki, Liviyanı vururlar, İraqı darmadağın edirlər, İrana qarşı sanksiyalar tətbiq edirlər, Ermənistana qarşı heç bir şey edə bilmirlər. Baxmayaraq ki, Ermənistan BMT-nin 4 qətnaməsini yerinə yetirmir. Bunlar bir daha sübut edir ki, Azərbaycanın özündən başqa dostu yoxdur və olmayacaq. Azərbaycanın tək yolu peşakar ordu yaradıb, torpaqlarını azad etməkdir".

Səxavət Məmməd
Ölkə.az