Macarıstan Putindən üz döndərdi

Orban Ukraynanın ərazi bütövlüyünə dəstəyini ifadə edib.

Ölkə.Az "Bloomberg"-a istinadən xəbər verir ki, əvvəllər Putinə olan xüsusi simpatiyası ilə seçilən Macarıstanın baş naziri Viktor Orban Kremldən üz döndərib. Nəşrin yaydığı məlumata görə, Kremldən 14 milyard dollarlıq kredit alan Orban son yarım ildə Rusiyanı müdafiə etmiş və Qərbi bu ölkəyə qarşı tətbiq edilən sanksiyaları ləğv etmək tələbini irəli sürmüşdü.

İndi isə Orban siyasi mövqeyini dəyişərək Ukraynanın ərazi bütövlüyünə dəstəyini ifadə edib. Bundan əlavə, macar nazir bəyan edib ki, xarici siyasətdə onun üçün Almaniya kompas rolunu oynayır. O, bu fikrini NATO-nun Litvadakı hərbi birləşmələrinə səfər edərkən bildirib.

"Bloomberg"-də qeyd olunur ki, nazirin fikrinin transformasiyasında Rusiyanın aqressiyasına qarşı yaradılmış Avropa cəbhəsinə başçılıq edən Almaniya kansleri Angela Merkelin böyük rolu var.

Rəşid Mustafazadə

Ölkə.Az