Politoloq: "Müdafiə naziri uğursuzluqlara qurban getdi"

Prezident P.Poroşenko müdafiə naziri Valeri Qeleteyi vəzifəsindən azad etməsi barədə xəbər vermişdik. 

Yayılan məlumatlara görə, ölkənin yeni müdafiə naziri artıq təyin olunaraq, ictimaiyyətə təqdim edilib. Bəs keçmiş müdafiə nazirinin vəzifəsindən çıxarılmasına səbəb nə oldu? Yeni müdafiə naziri ölkədə hər hansı hərbi dəyişiklik edə biləcək? Bütün bu suallara politoloq Ərəstun Oruclu ilə birlikdə cavab axtardıq.

Ölkə.Az-a danışan politoloq yeni nazirin qısa müddətdə vəziyyəti dəyişə bilməyəcəyini qeyd etdi.

"Mətbuatda gedən yazılarda Ukrayna ordusunu iflic vəziyyətinə salan yüzlərlə korrupsiya faktları üzə çıxd. Onların nə dərəcə dəqiq faktlar olduğunu deyə bilmərəm. Ukrayna ordusunda hətta Şərqi Ukraynadakı terrorçu, qiyamçılara silah ötürmə fakları belə qeydə alınmışdı. Bu da ordunun işinin və separatçılarla mübarizənin yarıtmaz qurulduğunu bir daha sübut etdi.Əməliyyatların uğursuzluğu Ukrayna ordusunun nə vəziyyətdə olduğunu gözlər önünə sərdi. Yüksək ehtimalla yeni müdafiə nazirinin təyin olunmasına da bu səbəb oldu. Həmçinin Şərqi Ukraynadakı döyüşlərdə bir xeyli mülki şəxs və dinc vətəndaş da öldü. Təbii ki, bunun siyasi tərəfləri də var ki, bu kiminsə ayağına yazılmalı idi. Görünür, müdafiə naziri bu baxımdan “qurbanlıq” edilib.. 

Yeni nazirə gəlincə, hər şey ordunun durumundan asılıdır. Hazırda Ukrayna ordusu faktiki olaraq müharibə vəziyyətindədir. Yeni nazir qısa müddətdə vəziyyəti dəyişə bilməyəcək. Çünki o, həm hərbi strateji vəziyyəti ən azından indiki durumda saxlamalıdır, həm də ordudakı neqativ halları aradan qaldırmalıdır. Yəni gördüyümüz kimi qarşıda çox vəzifələr var. Onun necə işləyəcəyini isə zaman göstərəcək". 

Qeyd edək ki, Ukrayna informasiya agentliklərində yayılan məlumatlara görə, P. Poroşenko bu vəzifəyə Milli Qvardiyanın komandanı, general polkovnik Stepan Poltorakı layiq görüb.

Fatimə İbrahimova

Ölkə.az