\"Gənclərə yaşıl işıq yandırıldığı kimi, yaşlı nəslin təcrübəsindən də yararlanmaq lazımdır\"

Bunu “Ölkə.Az”a açıqlamasında deputat Elman Nəsirov deyib.

Onun sözlərinə görə, ölkə başçısının həyata keçirdiyi kadr islahatları da səbəbsiz deyil.

“Ölkə başçısı bəyan edib ki, bu islahatlar geosiyasi, geoiqtisadi reallıqların dəyişməsi fonunda beynəlxalq iqtisadi konyuktura dəyişir. Yeni texnologiyalar, innovativ və kreotiv yanaşmalar bu gün dünyanın inkişaf mərhələsini təşkil edir. Belə olan halda təbii ki, gənc, perspektivli, istedadlı, iqtisadiyyatı bilən, vətənpərvər gənclərin önə çəkilməsi mühüm məsələyə çevrilib və onlara yaşıl işıq yandırılıb.

Cənab Prezident kadr islahatlarını həyata keçirərkən onu da vurğulayıb ki, gənclərlə yanaşı, müəyyən yaşlı nəslin təcrübəsinin sinxronlaşdırılmasına ehtiyac var və bu balans qorunmalıdır. Bu önəmli məsələdir”,- deyə deputat bildirib.

E.Nəsirov əlavə edib ki, ölkə başçısının dediyi kimi bu islahatlar kampaniya xarakteri daşımamalıdır və buna yol vermək olmaz:

“Kadr islahatları zamanı gənclərə yaşıl işıq yandırıldığı kimi, yaşlı nəslin təcrübəsindən də yararlanmaq lazımdır. Cənab Prezident prosesə bu cür yanaşır və kampaniyaçılığın əleyhinədir. Azərbaycan Prezidentinin kadr islahatlarının əsas qayəsi ölkənin bundan sonrakı inkişafına töhfə vermək, korrupsiya və rüşvətxorluğa qarşı mübarizə aparmaqdır. Ölkə başçısı da təyin etdiy kadrlara göstəriş verib ki, onlar bu məsələyə ciddi yanaşmalıdır və bunun kökü kəsilməlidir. Bu məsələdə gənc kadrların üzərinə çox ciddi iş düşür.  Elə emtək lazımdır ki, Azərbaycan dayanaqlı inkişaf tempini qoruyub saxlasın. Qeyri-neft sektorunun inkişafı üçün sahibkarlara dəstək verilməsi,  idarəetməni təkmilləşməsi paralel şəkildə getməlidir”.

 Deputat onu da bildirib ki, Prezident xüsusi olaraq bir məqama diqqət yetirərək, bəyan etdi ki, təyin olunan İcra başçılarına bu gün etimad var, amma sabah bu etimad olmaya bilər.

“Hər şey onlardan asılıdır. Onların əsas işi xalqa xidmət etmək və xalqın etimadını qazanmaqdır. Bu kadrlar ölkə başçısının onlara etdiyi etimadı doğrultmalıdırlar”, - deyə E.Nəsirov bildirib.

Mürtəza
Ölkə.Az