Rusiya üçün “cəhənnəm çəmbəri”: Məcbur etməyə çalışırlar ki... – ŞƏRH

Bunu “Ölkə.Az”a açıqlamasında siyasi şərhçi Əziz Əlibəyli Rusiya hərbi gəmisinin Qara dənizdə İngiltərənin Hərbi Dəniz Qüvvələrinin gəmisinə xəbərdarlıq atəşi açması ilə bağlı danışarkən deyib. O, Tramp (sabiq ABŞ prezidenti-red.) dövründə demək olar ki, Rusiyanın bir çox istiqamətlərdə, hətta Afrikada, yaxın Şərqdə ABŞ-ın mövqelərini ciddi şəkildə sarsıtdığını və bu bölgələrdə nüfuz əldə etdiyini söyləyib:
“ABŞ indi bunun qarşısını almağa çalışır. Birinci məsələ budur. İkinci və çox pis məqam ondan ibarətdir ki, bu günə qədər ABŞ ikinci və üçüncü dövlətlər vasitəsilə proksi müharibələrə həyata keçirirdilər. Amma ilk dəfədir ki, özləri toqquşurlar. Britaniyanın burada işirakı birbaşa ABŞ silahlarının, qırıcı təyyarələrinin bütövlükdə həmin bölgələr üzərində, yəni Qara dənizin Rusiya sərhədlərinə yaxın hissələrində uçuşlar həyata keçiməsi də, onu göstərir ki, ABŞ bütövlükdə Rusiyaya qarşı çox radikal şəkildə davranmağı düşünür. Bir neçə ciddi məsələ var. Onlardan da biri Brüssel sammitində əldə olunmuş bəzi nəticələrlə əlaqədar idi. Həqiqətən də indiki halda Rusiyanın danışıqlara getmək ehtiyacı var idi. Haradasa Putinin davranışlarında, mesajlarında əməkdaşlığa, daha yumşaq siyasət yürütməyə yönəlik mesajları var idi. Amma görünən hadisə ondan ibarətdir ki, Rusiyanı artıq məcbur etməyə çalışırlar". 

Ə.Əlibəylinin fikrincə, ABŞ Rusiya ilə ortaq məxrəcə gəlməmək üçün əlindən gələni edir:
“ABŞ dövlət katibi Blinken açıqlama verdi ki, bütövlükdə bütün əcnəbi silahlılar Liviyanı tərk eləməlidir. Bir həftə sonra isə Ukrayna və NATO-nun Qara dənizdə  hərbi təlimləri başlayır. Bu da çox ciddi faktordur. Nəhayət, bir neçə müddət sonra Putin-Zelenski görüşü  keçirilməli idi. Artıq ABŞ-ın yeritdiyi siyasət budur ki, ortaq məxrəc tapılmasın. Bu radikallaşma bütövlükdə Rusiya sərhədlərində, Rusiyanın maraqları olan hissələrdə “cəhənnəm çəmbəri” yaratmaq və Rusiyanı burada boğmaqdan ibarət olacaq. Buna nail olmaları sual altındadır. Artıq ABŞ Obama dönəmindən daha sərt siyasətin həyata keçirilməsinin tərəfdarıdır. Nəhayət vadar edəcəklər ki, Rusiya burada qarşı cavab kimi özünün strateji hücum silahlarını bu ölkələrlə yaxın olan sərhədlərdəki mövqelərinə - məsələn, Şərqi Avropaya, ABŞ-a yaxın hissələrdə yerləşdirsin. 

Hətta Berinq boğazı kimi strateji nöqtələr belə təhlükə altında ola bilər. Bu davranışlar davam edən prosesdir”. 

Politoloqun sözlərinə görə, Rusiya və ABŞ-ın ilk dəfə bu şəkildə üz-üzə gəlməsi, bir sıra dövlətlər üçün problem yaradacaq:
“Konkret olaraq ölkələrin birbaşa üz-üzə gəlməsi Türkiyə üçün problem yaradacaq. Çünki Türkiyə həm NATO ölkəsidir, həm də Rusiya ilə müttəfiqdir. Bu proses Azərbaycana da ciddi təsir göstərəcək. Bu hal bizim nöqteyi-nəzərimizdən müsbət dinamika deyil, zərəri çox ola bilər. Vəziyyətin daha da gərginləşmə ehtimalı var. Çünki mütləq şəkildə ABŞ-ın indiki prezidenti Rusiyaya yönəlik siyasətində hansı zərbə ilə yadda qalmalıdır. Bayden Avroatlantik məkanı səfərbər edib Rusiyanın üzərinə tökməklə göstərməlidir ki, Rusiyanın əlindən nəyisə ala bildi. Amma Rusiya da Ukraynaya özü kimi yanaşır və əldən buraxmaq niyyətində deyil. Hətta prosesləri inkişaf etdirib Moldovanı, Dnestryanını, o cümlədən Rumıniya və Bolqarıstana da zərbə vurmaqla yekunlaşdıra bilər”.

Ekspert Böyük Britaniyanın Rusiya MN-nin yaydığı məlumatı təkzib etməsini təxribatın sübutu kimi qiymətləndirib:
“İngiltərə Müdafiə Nazirliyi belə bir məlumat yayıb ki, ruslar Qara dənizdə atış təlimləri həyata keçirirmiş. Gəmiyə heç bir atəş açılmadığı deyilir. İngilislərin bəyanatı da göstərir ki, bu hadisədə tam şəkildə təxribat var.

Ayın 21-də həmin gəminin göyərtəsində Britaniya hökuməti ilə Ukrayna arasında sənəd imzalanıb. Rusiya isə bu sənədi hesab edir ki, imzalanan sənədlər onun milli təhlükəsizliyinə ciddi zərbə vurur. Amma həmin sənədin detalları məlum deyil”.

Billurə Yunus