Moskva Ukraynada taktikasını dəyişdi - Kremlin Qərbə yeni təzyiq metodu

Ukrayna tərəfi müharibənin dayandırılıb danışıqlar masası arxasına keçməsi ilə bağlı dəfələrlə açıqlama verib. Ən sonuncusu isə martın 18-də etdiyi videomüraciətdə Volodimir Zelenski bildirib ki, hərbi əməliyyatların dayandırılıb, danışıqlara başlamasının vaxtı çatıb. Lakin Moskva isə atəşkəsdə maraqlı deyil. Baxmayaraq ki, sözdə atəşkəsə razı olduğunu desə də, əməldə bu istiqamətdə konkret addım atmır. Rusiya hərbi əməliyyatları davam etdirməkdə maraqlı görünür. 
Moskvanın son günlərdə Ukraynada həyata keçirdiyi hərbi əməliyyatlar taktikasına nəzər yetirsək, o zaman rus ordusunun yeni taktikaya üstünlük verdiyinin şahidi olarıq. Belə ki, rus ordusu ilk günlərdə olduğundan fərqli olaraq irəliyə Ukraynanın dərinliyinə doğru hərəkətlərini zəiflədib. Əsas diqqəti nəzarətinə keçirdiyi bölglərdə mövqelərinin möhkəmləndirməyə yönəlib. Bundan əlavə olaraq həmin ərazilərdə humanitar fəlakət yaratmaq, təzyiq yolu ilə yerli əhalinin köçünə nail olmağa çalışır. Rus ordusu humanitar fəlakət yaratmaq, qaçqın ordusunun artması üçün hava hücumlarından istifadə edərək mülki, sənaye və digər obyektlərə raket, bomba zərbələri endirib, bacardığı qədər ciddi dağıntılara yol açmaqdır. Baxmayaraq ki, bu gün atəşkəsə Rusiyanın daha çox ehtiyacı var. Amma bunun əksini seçib.

Rusiya bu yolla əslində təkcə Ukrayna hakimiyyətinə və xalqına deyil, həm də Qərbə təzyiq taktikası kimi istifadə edir. Belə desək Moskva "va-bank" taktikasını seçib. Necə deyərlər: "islanmışın, yağışdan nə qorxusu".

Birincisi, Kreml humanitar fəlakət və qaçqın ordusu yaratmaqla Qərbə təzyiq edir. Çünki bəzi Avropa ölkələri ukraynalı qaçqınların çox olmasından ciddi narazılığını dilə gətirməkdədir. Onlar hesab edir ki, ukraynalı qaçqınların Avropa ölkələrinə axını ciddi problemlərə yol açacaq. Kreml də bunu yaxşı bildiyindən bacardıqca ukraynalı qaçqınların Avropa axınına nail olmaq istəyir. Bu yola həm Qərbin mövcud  birgə mövqeyində çat yaratmaqla Avropanı geri otuzdurmaq istəyir, həm sanksiyaların yumşaldılmasına çalışır, həm də danışıqlarda öz şərtlərini diktə etmək istəyir.

İkincisi, Kreml ağır və icazəsi qadağan olunan raketlərdən istifadə etməklə Qərbi hədələyərək,  demək istəyir ki, lazım gələrsə, daha ağır raketlərdən istifadə edə bilər. 

Üçüncüsü, Qərbi təxribata cəlb edib, onları da münaqişə tərəfinə cəlb etmək istəyir. Bu yolla  Moskva daha genişmiqyaslı və ağır silahlardan istifadəsinə nail olmaq istəyir. 

Yəni bu gün Moskvanın əsas məqsədi Qərbin sanksiyalarını durdurub, yumşaltmaq və geri otuzdurmaq, humanitar fəlakət, nüvə müharibəsi və ya Üçüncü Dünya müharibəsi ilə hədələyib qorxutmaqdır. Bunun üçün də lazım gədikdə Ukraynada ən sərt taktikalara əl atır ki, baxın, istənilən an bu addımları ata bilərəm. Və belə addımı atmaqdan çəkinmirəm. Məhz bunun nəticəsidir ki, Qərb Rusiyanı Ukraynada durdurmaq üçün qətiyyətli addımlar ata bilmir və bundan çəkinir. Moskva ümid edir ki, bu taktikanı həyata keçirməklə istəyinə nail ola bilər. Ona görə də atəşkəsin elan edilib danıqşılar masasına keçməsində maraqlı görünmür. Moskva o zaman danışıqlara razı olacaq ki, ya Qərb və Kiyev onun dediyi bir çox şərtləri qəbul etsin, yaxud da Rusiya öz gücünü yenidən səfərbər etmək üçün müvəqqəti sülhə razılıq verir.

Artıq Qərb ölkələrindən də bu istiqamətdə müəyyən mesajlar verilməkdədir.

Mürtəza Bünyadlı
Ölkə.Az