Sabah Moskvada Qarabağla bağlı önəmli QƏRAR gözlənilir: Putin-Paşinyan görüşündən GÖZLƏNTİLƏR

"Ölkə.Az" xəbər verir ki, bunu Milli.Az-a açıqlamasında Rusiya Xalqlar Dostluğu Universitetinin dosenti, siyasi jurnalist Anar Həsənov deyib.

O, bildirib ki, Ermənistanla Azərbaycan arasında sabitliyin əldə olunması məsələsində Rusiya pozucu rol oynamayacaq:

"Rusiyanın Qarabağla bağlı siyasəti verilən bəyanatlarla, imzalanan sənədlərlə demək olar ki, üst-üstə düşür. Sadəcə hər iki cəmiyyətdə müxtəlif gözləntilər var və o gözləntilərə nail olmayanda, - cəmiyyət sülh prosesinin bu və ya digər iştirakçılarını bir moderator kimi, - Rusiyanın ünvanına müəyyən tənqidlə çıxış edir. Hesab edirəm ki, Qarabağla bağlı Paşinyanın Moskva səfəri hər hansı bir münasibətin dəyişməsinə, Azərbaycanın ərazi bütövlüyünün bərpası məsələsinə maneə yaradacaq deyil.

Bu səfərin arxasında dayanan Paşinyanın 9 noyabr bəyanatının bəndlərinə riayət etməklə bağlı çağırışlarla yadda qalacaq. Başqa sözlə, bilirsiniz ki, Rusiya üçün vacib olanı kommunikasiyaların açılmasıdır. Rusiya qarşısında Qarabağın Azərbaycanın və yaxud da Ermənistanın tərkibində olması kimi bir tapşırıq qoymayıb. Amma Rusiyanın qarşısındakı tapşırıqlardan biri regionda sabitliyin bərpasıdır və kommunikasiya xəttlərinin açılmasıdır. Ermənistan sülh sazişinə getmədiyi və kommunikasiya xəttlərinin bərpasını iqnor etdiyi təqdirdə yüzdə-yüz Azərbaycan Ordusunun, yumşaq desək, dislokasiya mövqeyini tapmaqla bağlı müəyyən gedişatlarını öz üzərində hiss edəcək.

Rusiya da Azərbaycanın hər hansı bir yüksəkliyi ələ keçirməsi ilə bağlı, hər hansı bir kənddə öz bayrağını ucaltması ilə bağlı insidentlərə hərb yolla cavab verməyəcək, çünki Azərbaycanla Rusiya arasında müttəfiqlik haqqında saziş var. 

Belə deyək, hissəbəhissə, addımbaaddım Azərbaycanın bu gün tətbiq etdiyi taktiki gedişatlar Rusiya tərəfindən hər hansı bir təcavüzlə qarşılanmayacaq. Nəticə etibarı ilə Ermənistan hakimiyyəti daima dərin böhran içərisində olacaq. Ona görə də Rusiya bu böhranın dərinləşməməsi üçün Ermənistanı öz üzərinə götürdüyü öhdəlikləri yerinə yetirməyə çağıracaq. Öhdəliklər də kommunikasiya xəttlərinin açılması, delimitasiya-demarkasiya məsələləri ilə bağlı Ermənistandan real addımların gözləntisidir. 

Rusiya Cənubi Qafqazda sabitliyin tərəfdarıdır. Sabitlik və sülh fərqli-fərqli anlayışlardır. Məsələn, Azərbaycanla Türkiyə arasında sülh var. Bu, sabitlik deyil, bu əsl sülhdür. Yəni bu gün Azərbaycanda və Türkiyədə hər hansı bir adamın ağlına gəlməz ki, bu iki dövlət arasında hər hansı bir qeyri-sabitlik yarana bilər. Bu, sülh şəraitidir. Düzdür, Azərbaycanla Türkiyə arasında münasibətlərin yaxşılaşması üçün hər hansı bir ictimai təşkilatların, Kütləvi İnformasiya Vasitələrinin xüsusi rol oynamasına ehtiyac yoxdur. Çünki zatən iki dövlət arasında sülh var. 

Amma Ermənistanla Azərbaycan arasında nə sülh var, nə sabitlik var. Və hətta sülh sazişi bağlansa belə bu o demək deyil ki, Azərbaycanla Ermənistan arasında sabitlik bərqərar olacaq. Bu sabitliyin bərqərar olması üçün uzun illər lazımdır. Baxın, Rusiya Azərbaycanla Ermənistan arasında nisbi sabitliyin tərəfdarıdır. Ona görə də Ermənistanla Azərbaycan arasında sabitliyin əldə olunması üçün hansı siyasət lazımdırsa, Rusiya həmin siyasəti dəstəkləyir. Ona görə düşünmürəm ki, Rusiya bu prosesdə pozucu rol oynayacaq. Yox, əsla pozucu rol oynamayacaq. Rusiya çünki özü marağındadır ki, iki ölkə arasında sabitlik olsun və bu sabitlikdən sitifadə edib, Rusiya həm də öz iqtisadi dividentlərini qazansın". 

Qeyd edək ki, Ermənistanın baş naziri Nikol Paşinyan sabah Kremldə Rusiya prezidenti Vladimir Putinlə görüşəcək.