Sabiq nazir: Rusiya Cənubi Qafqazdan gedir, yerini Türkiyəyə verir
Rusiya Ermənistana hərbi yardım etmək niyyətində deyil
"Paşinyanın Qərb ölkələrinə səfərindən sonra dərhal Moskvaya gedib hesabat verməsi bir siyasi ənənə halını alıb. Bu da onu göstərir ki, Ermənistanın xarici siyasətində ziddiyətlər mövcuddur. Ziddiyyətlər də ondan ibarətdir ki, İrəvan təhlükəsizlik məsələsini Rusiya ilə, maddi problemini isə Qərblə həll etməyə çalışır. Təbii ki, bu da həll olunan məsələ deyil və hər zaman problem olacaq".
Bunu "Ölkə.Az"a açıqlamasında sabiq xarici işlər naziri Tofiq Zülfüqarov Paşinyanın Moskva səfəri və Putinlə görüşünün yekunlarını şərh edərkən deyib.
Rusiyanın Qarabağdakı ermənilərin təhlükəsizliyini təmin etmək niyyəti yoxdur
Sabiq nazirin sözlərinə görə, Rusiya rəsmi elan edib ki, bundan sonra hərbi yardım baxımından Ermənistana hər zaman olduğu kimi dəstək verə bilməyəcək.
"Əks proses başlayıb. Ermənistan ərazisindəki Rusiya hərbi bazasındakı hərbi texnika və silahlar artıq bu ölkədən çıxarılır. İlk növbədə bu qırıcı təyyarələri nəzərdə tuturam. Vaxtında deyirdim ki, bu görüntü yaratmaq üçün bir şoudur. İndi isə bu özünü sübut edir. Ümumiyyətlə hərbi baxımdan Rusiya Ermənistana yardım etmək istəmir", - deyə Zülfüqarov qeyd edib.
Sabiq nazir əlavə edib ki, Ermənistanın Rusiyadan digər istəyi Qarabağdakı ermənilərin gələcəyi ilə bağlı olan məsələdir ki, Moskva İrəvanın bu istəyinə də müsbət reaksiya vermir.
Azərbaycanın Laçında gömrük-keçid məntəqəsi tələbi...
Birincisi, Azərbaycan Laçında gömrük-keçid məntəqəsinin qurulmasını istəyir.
Azərbaycanın ikinci əsas tələbi Qarabağda təhlükəsizliyi Rusiya sülhməramlıları təmin etdiyindən oradakı qanunsuz hərbi birləşmələrin hansı fəaliyyətlə məşğul olması hesabatının verilməsi və təcili tərksilah edilməsidir. Hansı ki, bu məsələ 10 noyabr 2020-ci il bəyanatında da əksini tapıb. Bütün bunlar Ermənistanı Moskvadan özünə dəstək axtarmağa vadar edir. Proses hansı sonluqla bitəcək bunu zaman göstərəcək. Amma görünən odur ki, Ermənistan öz istəklərinə nail ola bilməyəcək".
Laçında Ermənsitanla gömrük-keçid məntəqəsinin qurulması ilə bağlı məsələyə aydınlıq gətirən sabiq nazir deyib ki, proseslər buna doğru gedir:
"Sülhməramlıların nəzarət etdikləri ərazidə təhlükəsizlik məsələsinin təmin etməsi və qanunsuz hərbi birləşmləri tərksilah etməsi də məntiqə sığan məsələ deyil. Ona görə də orada qanunsuz hərbi birləşmələr fəaliyyət göstərə bilməz. Ermənistan bu dediyim məsələlərin qarşısını alıb, istəyinə nail olmaq istəyir, amma artıq bu mümkün olmayacaq".
Sabiq nazir bildirib ki, biz Ermənistan-Azərbaycan münaqişəsində vasitəçilik missiyasından danışanda, təkcə Rusiyanı deyil, eyni zamanda Türkiyəni də nəzərə almalıyıq: "Rusiya tək deyil, Türkiyə də var. Düzdür, Türkiyənin fəaliyyəti qabarıq şəkildə özünü biruzə vermir, amma danışıqlar masasında var. Burada eyni zamanda Azərbaycan da var. Azərbaycan danışıqlarda hansı məsələnin reallaşması üçün təzyiq edib, tələb irəli sürəndə bu, Türkiyə tərəfindən dəstəklənir".
Zülfüqarovun fikrincə, Rusiyanın indiki üzləşdiyi vəziyyət məcbur edir ki, Ukrayna müharibəsi fonunda bölgədə Türkiyənin rolu və mövqeyi artsın.
Rusiya Cənubi Qafqazdan gedir, yerini Türkiyəyə verir...
"O baxımdan da biz Paşinyanın Moskvaya səfərini Azərbaycanın təzyiqinin qarşısını almaq cəhdi kimi qiymətləndirə bilərik. Hesab edirəm ki, Paşinyan bunun qarşısını ala bilməyəcək.
Çünki Rusiyanın getdikcə bölgəyə marağı azalır. Ona görə də indiki şəraitdə Rusiyaya Türkiyə ilə münasibətlərini yüksək səviyyədə saxlamaq maraqlıdır. Bu baxımdan da Azərbaycanın irəli sürdüyü məsələlərdə israrlı olmasının ciddi geopolitik əsasları var.
Ermənilər panikada....
Belə ki, vəziyyəti təhlil etsək biz bu tendensiyanı görərik. Rusiyanın imkanları getdikcə sürətlə azalır. Bu proses ikinci dalğadan sonra daha da sürətlənəcək. Yəni Rusiyaya tətbiq edilən sanksiyalar ciddi formada öz təsirini göstərəcək. Bu baxımdan da 10 noyabrda vasitəçi qismində çıxış edən iki ölkədən biri olan Rusiyanın mövqeyi zəifləyir, Türkiyənin rolu isə önə çıxır. Məhz Ermənistanı da ciddi narahat edən bu məsələdir. Ermənilər təşviş içindədirlər. Odur ki, Ermənistanda son günlərdə məqsədi bəlli olmayan siyasi hadisələr baş verir. Gah parlamentdəki deputatalar Qarabağa gedəcəklərini bəyan edir, gah da aksiya keçirirlər. Artıq ciddi panika içindədirlər. Bunlar ciddi addım deyil. Guya onlar Qarabağ gəlib neyənəcəklər ki? Müharibə zamanı gəlib nə etdilər ki?... Sonda qaçıb getdilər.
Azərbaycan istəyinə nail olacaq
Bütün bunlar onu deməyə əsas verir ki, Azərbayacan adım-addım məqsədlərinə doğru irəliləyir və buna nail olacaq.
Qərbin buradakı proseslərə müdaxilə imkanı yoxdur. Əgər Rusiya bölgədədirsə Qərblə qarşıdruma fonunda öz səlahiyyətini Türkiyəyə verəcək. Bu tendensiyanı nəzərə alaraq Azərbaycan təzyiqləri gücləndirməlidir və bununla da istəklərimizə nail olacağıq"-sabiq nazir bildirib.
Mürtəza
Ölkə.Az
