“Rəsul Həmzətov ili” çərçivəsində tədbirlər davam etməkdədir
Bu barədə Ölkə.Az-a Bakı Slavyan Universitetinin doktorantı Lətafət Əliyeva məlumat verib.
Həmin tədbirdə Mədəniyyət nazirinin müavini Səadət Yusifova çıxış edib və Rəsul Həmzətovun zəngin yaradıcılığından, Azərbaycanda olan çoxsaylı şair dostları – Səməd Vurğun, Nəbi Xəzri, Bəxtiyar Vahabzadə, Cabir Novruz, Məmməd Araz və digər şairlərlə olan dostluq əlaqələrinə toxunub.
Rəsul Həmzətov həmişə Azərbaycana böyük sevgi ilə yanaşıb, vaxtaşırı Azərbaycanda olub, şair dostları ilə görüşüb və Xəzər dənizi, Bakı şəhəri haqqında da çox gözəl şeirlər yazıb. Bu şeirlər müxtəlif dillərə tərcümə də olunub.
Tədbirə Dağıstan Respublikasının mədəniyyət naziri Zarema Butayeva, nazir müavini Murad Hacıyev, Dağıstanın millət vəkili, digər rəsmi qonaqlar və ziyalılar təşrif buyurub. Eyni zamanda Rusiya səfirliyinin də nümayəndələri iştirak ediblər və Rusiyadan gələn mədəniyyət xadimləri də öz ifaları ilə tədbirdə yer alıblar.
Gecədə şairin qızı Salihət xanım da iştirak edib və o, öz çıxışında Azərbaycanda keçirilən konsert proqramına görə, atasına verilən bu dəyərə görə dərin minnətdarlığını bildirib.
"Məlum olduğu kimi, bu il Rusiyada “Rəsul Həmzətiov ili” elan olunub. Dəyərli, görkəmli publisist-politoloq Reyhan Mirzəzadənin Rəsul Həmzətovun həyat və yaradıcılığına həsr etdiyi kitabı dərc olunub. Qeyd etmək istərdim ki, girişdə nümayiş olunan sərgidə Rəsul Həmzətovun müxtəlif anlarını əks etdirən foto-sənədlər və onun haqqında çıxan kitabların içərisində həmyerlimiz R.Mirzəzadənin “Milyonların nəğməkarı – Rəsul Həmzətov” adlı kitabı da yer alıb. Çox sevindirici və təqdirəlayiq məqamlardan biri də odur ki, Dağıstandan gələn qonaqlar bu kitaba xüsusi maraqla yanaşıblar. Həmin kitabın Azərbaycanda çap olunması onlarda çox yüksək xoş təəssürat yaradıb və onlar gələcəkdə Reyhan xanımla əlaqələrinin davam etməsini və Dağıstanda keçiriləcək tədbirlərdə onu da görmək arzusunu bildiriblər", - L.Əliyeva söyləyib.
Girişdə Rəsul Həmzətovla bağlı foto-sərgi, kitablar, foto-sənədlərlə yanaşı, Dağıstanın milli dəyərlərini yaşadan əl işlərinin nümunəsi də təqdim olunub.
Eyni zamanda konsert boyu səhnədə, böyük monitorlarda Rəsul Həmzətovun fotoşəkilləri, xatirə videoları, Dağıstanın füsunkar mənzərələri nümayiş olunub.
"Bir tamaşaçı kimi, deyə bilərəm ki, tədbirin ssenarisi hamının zövqünü oxşadı. Böyük təəssürat və yaddaqalan məqamlardan ibarət olan tədbir tamaşaçıların ürəyincə oldu və anşlaqla keçdi.
“Rəsul Həmzətov ili”nə həsr olunmuş silsilə tədbirlər onun öz doğma yurdu olan Dağıstanda davam etməkdədir", - deyə o söyləyib.
