Rektorun sözləri gündəm oldu: arxa partada corablarını çıxardı... - AÇIQLAMA

Ölkə.Az xəbər verir ki, rektor işlədiyi bu illərdə heç vaxt imtahanların gedişi zamanı auditoriyaya daxil olub nəyəsə nəzarət etmədiyini bildirib. O, rektor olaraq buna ixtiyarının olmadığını və tələbənin diqqətini yayındırmaq istəmədiyini qeyd edib:

"Bizim vəzifəmiz şəffaf imtahan sistemini qurmaq və sistemin fəaliyyətini nəzarətdə saxlamaqdır".

Rektor daha bir paylaşım edərək BANM-da bir neçə il dərs demiş italiyalı müəllim Nikola Heylperni misal göstərib:

"Hazırda ali təhsil müəssisələrində semestr imtahanlarının gedişinin ən qızğın çağıdır.
Bu, danılmaz həqiqətdir ki, tələbələr imtahan zamanı həmişə çox gərgin, həyəcanlı olurlar. Bu səbəbdən nəzarətçilər, müəllimlər tələbələrin imtahan anlarındakı gərgin və həyəcanlı durumunu başa düşməli, olduqca həssas davranmalıdırlar.

Ali Məktəbimizin MBA proqramında Nikola müəllim dərs deyirdi. O, eyni zamanda məşhur İtaliya şirkətinin Bakı üzrə rəhbəri idi. Böyük vəzifəsi olsa da, hədsiz sadəliyi ilə tələbələrin sevimlisinə çevrilmişdi.

Tələbələrimizdən biri mənə Nikola müəllimin imtahandan əvvəl arxa partaya keçərək heç kimin diqqətini cəlb etmədən ayaqqabılarını səliqəli şəkildə çıxardığını və corabının üstünə özü ilə əvvəlcədən gətirdiyi başqa bir corab geyinərək nəzarət işini həyata keçirdiyini bildirdi.

Bəli, məhz imtahan zamanı tələbələrin diqqətini ayaq səsləriylə yayındırmamaq üçün Nikola müəllim belə etmişdi".

Fotoda Nikola Heylpern

Mövzu ilə bağlı Ölkə.Az-a danışan təhsil eksperti Elmin Nuri rektorların imtahan zalına daxil olması barədə qadağadan məlumatsız olduğunu deyib. Bununla belə, o, rektorların bu davranışında heç bir qəbahət olmadığını düşünür:

"Rektorun imtahan keçirilən zala daxil olması ilə bağlı hər hansı qadağa olması barədə eşitməmişəm. Bununla bağlı hər hansı bir qanunvericilik aktının olmasından da xəbərsizəm. 

Düzdür, dünyanın heç bir yerində elə bir ənənə yoxdur ki, yay və qış imtahanları sessiyasında rektor auditoriyaya daxil olaraq imtahan prosesini izləsin. Amma burada hər hansı bir mənfi tendensiyanın olmadığını düşünürəm".

Ekspert deyir ki, rektorların imtahan keçirilən otaqlara gəlməsinin əsas səbəbi subliminal mesaj verməkdir:

"Sessiyaya daxil olan prosesi izləyən rektorların buradakı məqsədi qətiyyən imtahan prosesinə mane olmaq deyil. Onsuz da imtahan sessiyası zamanı zala daxil olan rektorlar orada bir neçə dəqiqə qalırlar. Mənə elə gəlir ki, bunun da səbəbi tələbəyə subliminal olaraq "biz sizin yanınızdayıq" mesajını verməkdir. Bu aspektdən hesab edirəm ki, rektorların imtahan sessiyası vaxtı gəlməsi vacibdir. 

Düzdür, onunla razıyam ki, bir universitetin əsas vəzifəsi imtahan sistemini düzgün qurmaq və onun düzgün fəaliyyətinə nəzarət etməkdir. Amma bu o demək deyil ki, imtahanı izləyən rektorlar buna əməl etmirlər. Yəni mən rektorların gəlişini imtahan prosesinə müdaxilə hesab etmirəm".

Qeyd edək ki, Azərbaycanda yerləşən bir sıra universitetlərin rektorları imtahan sessiyası zamanı zala daxil olaraq imtahanların gedişi ilə tanış olurlar. Buna misal olaraq Bakı Dövlət Universitetinin rektoru Elçin Babayevi, Bakı Mühəndislik Universitetinin rektoru Havar Məmmədovu,  Azərbaycan Dillər Universitetinin rektoru Kamal Abdullanı göstərmək olar.

Billurə Yunus