Yanan "Diqlas"ın yerində yeni ticarət mərkəzi tikiləcək
Bakı şəhəri, Nizami rayonu, Qara Qarayev prospekti, 239 ünvanında (əvvəllər “Diqlas” ticarət mərkəzinin yerləşdiyi ərazidə) yeni ticarət mərkəzinin tikintisi nəzərdə tutulur.
Bu barədə Ölkə.Az-a Dövlət Şəhərsalma və Arxitektura Komitəsindən məlumat verilib.
Bildirilib ki, 10 dekabr 2024-cü il tarixində Azərbaycan Respublikasının Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi tərəfindən qeyd olunan ünvanda ümumi sahəsi 3200 m² olan 5 mərtəbəli qeyri-yaşayış təyinatlı ticarət kompleksinin tikintisinə icazə verilib.
Qeyd edək ki, 2019-cu ilin martın 26-da Bakının Nizami rayonu, Qara Qarayev küçəsi 81Q ünvanında yerləşən "Diqlas" ticarət mərkəzində yanğın baş verib. Yanğın mərkəzdə yerləşən dönərxanalardan birində başlayıb.
