Perinçək Qarabağdan danışdı: \"Görəcəksiniz, Azərbaycan bayrağı Qarabağda dalğalanacaq!\"

"Məhkəmənin qərarı Türkiyənin müdafiəsi üçün və hətta deyərdim ki, Qarabağ üçün də son dərəcə tarixi önəmli bir qərardır".

Ölkə.Az xəbər verir ki, bu fikirləri "AzVision.az"a açıqlamasında Türk İşçi Partiyasının sədri, tanınmış siyasətçi Doğu Perinçək deyib.

O, azərbaycanlılara mübarizədə bərabər olduqlarına görə təşəkkür edib.

"Bu qərar hər bir insanın Vətəni qorumaqda azad olduğunu göstərir. Biz onu söylədik ki, “erməni soyqırımı” bir yalandır və Vətəni müdafiə etdik. Bu qələbəni mübarizəmizlə qazandıq. Azəri Türk qardaşlarımıza çox təşəkkür edirəm ki, bu mübarizədə bərabər olduq, bütün türklərlə əl-ələ verdik və doğru olduğumuzu bur daha sübut etdik. Bunu da görəcəyik ki, Qarabağımızı azad etmişik və Azərbaycanın torpaq bütünlüyü təmin edilib. Gələcəyə ümid və güvənlə baxırıq. Görəcəksiniz, Azərbaycan bayrağı Qarabağda dalğalanacaq! Millətimiz bir olacaq, özgür olacaq!", - deyə siyasətçi qeyd edib.

Xatırladaq ki, Perinçək 23 iyul 2005-ci ildə İsveçrənin Lozan şəhərində keçirilən mitinqdə dediyi "Erməni soyqırımı beynəlxalq yalandır!" sözlərinə görə polis tərəfindən saxlanılmışdı. Türkiyənin müdaxiləsi ilə sərbəst buraxılan Perinçək daha sonra məhkəmə tərəfindən 3 ay həbs cəzasına məhkum edilsə də, məhkumiyyəti pul cəriməsi ilə əvəz edilmişdi.

Sözügedən iş üzrə keçirilən bir neçə məhkəmə prosesindən sonra nəhayət, dünən “erməni soyqırımının inkar edilməsi” üçün cinayət məsuliyyətinə cəlb edilən ilk adam olan Doğu Perinçək İsveçrə hökuməti üzərində tam qələbə qazanıb.

Rəşid Mustafazadə

Ölkə.Az