Küveytdən İrana NOTA: Diplomatlar 24 saata Küveyti tərk etsin 

Küveyt İrandan gecə saatlarında edilən hücumlardan sonra iki İran diplomatını "persona non qrata" elan etməklə yanaşı,  İran səfirliyindəki işçilərin sayını azaltmaq qərarına gəlib.

Ölkə.az xəbər verir ki, bu barədə Küveyt Xarici İşlər Nazirliyinin yazılı açıqlamasında deyilir.

Məlumatda qeyd olunub ki, İranın Küveytdəki müvəqqəti işlər vəkili Həmid Yakubi Ferin Küveyt XİN-ə çağırılıb.

Bəyanatda bildirilir ki, İranın davam edən hücumları və Küveytdəki İran səfirliyindəki işçi sayının azaldılması ilə bağlı etiraz iranlı diplomata çatdırılıb.

Küveyt İranın ölkədəki səfirliyində çalışan iki iranlı diplomatı arzuolunmaz şəxs (persona non qrat) elan edib və onları 24 saat ərzində ölkəni tərk etmələrini tələb edib.

Məlumata görə, bu qərarlar İranın Küveytə hücumlarından sonra verilib. Hücumlar nəticəsində Küveyt Beynəlxalq Hava Limanı da daxil olmaqla, çoxsaylı mülki və həyati əhəmiyyətli obyektlər hədəfə alınıb.

İran hücumlarında bir nəfərin öldüyü qeyd edilən bəyanatda, bu hücumların Küveytin suverenliyini və ərazi bütövlüyünü, Birləşmiş Millətlər Təşkilatının Nizamnaməsini və BMT Təhlükəsizlik Şurasının 2817 saylı qətnaməsini açıq şəkildə pozduğu vurğulanıb.

İran hücumlarını qətiyyətlə pisləyən bəyanatda Küveytin öz ərazisinin və hava məkanının heç bir ölkəyə qarşı düşmənçilik hərəkətləri üçün istifadəsinə "qətiyyən" icazə verməyəcəyi bildirilir.
Bəyanatda İranın iddiaları "əsassız" adlandırılıb və əlavə edilib ki, bu iddialar Küveyt ərazisinə, mülki şəxslərə və həyati əhəmiyyətli infrastruktura hücumlara əsas vermir.

Mürtəza