Rusiyada miqrantlar üçün yeni mərhələ: Rüsumlar kəskin artırılır (ŞƏRH)
Rusiya miqrantlara qarşı növbəti sərtləşdirici addım atıb. Dövlət Duması ölkədə yaşamaq və işləmək istəyən xarici vətəndaşlar üçün maliyyə şərtlərini əhəmiyyətli dərəcədə sərtləşdirən qanunlar paketini qəbul edib. Dəyişikliklər çərçivəsində miqrasiya ilə bağlı dövlət rüsumlarının ciddi şəkildə artırılması nəzərdə tutulur.
Məsələn, Rusiya vətəndaşlığının alınması üçün rüsum 12 dəfə artırılaraq 4 200 rubldan 50 000 rubla çatdırılır. Daimi yaşayış icazəsinin (VNZhP) rüsumu 6 000 rubldan 30 000 rubla, müvəqqəti yaşayış icazəsinin (TRP) rüsumu isə 1 920 rubldan 15 000 rubla qaldırılır.
Ölkə.az xəbər verir ki, Milli Məclisin deputatı Azər Allahverənov Qaynarinfo-ya açıqlamasında bildirib ki, insanların Rusiyaya üz tutmasında əsas məqsəd əmək fəaliyyəti ilə məşğul olmaqdır:
"Bu qərardan sonra miqrantlar əmək bazarında daha yüksək maaşlı iş axtarışına yönələcəklər. Eyni zamanda, rüsumları ödəməklə yanaşı ailələrini təmin etmək üçün daha çox gəlir toplamağa çalışacaqlar. Düşünmürəm ki, bu qərar miqrasiyaya ciddi təsir edəcək, maksimum 1–2 faiz azalma ola bilər".
Azər Allahverənovun sözlərinə görə, iqtisadi baxımdan bu qərar əmək miqrantları üçün əlverişli sayılmır:
"Rusiyanın aidiyyəti strukturları miqrasiya siyasətinin daha da sərtləşdirilməsi istiqamətində müxtəlif təşəbbüslərlə çıxış edirlər. Məqsəd miqrasiya proseslərini dövlətə daha çox fayda verəcək şəkildə tənzimləməkdir. Əgər bu istiqamətdə sərtləşdirməyə ehtiyac görülürsə, addımlar atılır".
Deputat əlavə edib ki, zaman-zaman bu mövzuda siyasi bəyanatlar da səslənir:
"Geniş müzakirələrdə qeyd olunur ki, ölkədə çoxsaylı miqrantların mövcudluğu fonunda diferensial yanaşma tətbiq olunmalıdır. Məqsəd əsasən faydalı hesab edilən miqrantların qalmasını təmin etməkdir. Burada "fayda" dedikdə daha çox iqtisadi gəlir gətirən şəxslər nəzərdə tutulur. Bu səbəbdən əmək miqrantlarına münasibətdə selektiv yanaşma açıq şəkildə görünür. Hədəf ondan ibarətdir ki, ölkədə daha çox yüksək ixtisaslı miqrantlar olsun".
