Şahzadənin oğlu 4 il həbs cəzası aldı

Norveç şahzadəsi Mette-Maritin 28 yaşlı oğlu Marius Borq Heybi bir sıra cinayətlərdə, o cümlədən iki zorlama faktında təqsirli bilərək 4 il müddətinə azadlıqdan məhrum edib.

Ölkə.az xəbər verir ki, Heybiyə ümumilikdə 40 ittiham irəli sürülüb. Bunların arasında dörd zorlama epizodu da olub. Məhkəmə həmin ittihamlardan ikisi üzrə ona bəraət versə də, digər iki epizod üzrə təqsirli hesab edib. Prokurorluq iddia edib ki, bütün hallarda zərərçəkən qadınlar hadisə zamanı ya yatmış vəziyyətdə olub, ya da müqavimət göstərmək iqtidarında olmayıb.

Məhkəmə Heybini ümumilikdə 34 maddə üzrə təqsirli bilib. Bunlara keçmiş sevgilisi Nora Hauklanda qarşı zorakılıq, altı epizod üzrə seksual xarakterli təhqiramiz davranış, yol hərəkəti qaydalarının pozulması, narkotiklərlə bağlı cinayətlər və məhkəmənin yaxınlaşma qadağasının üç dəfə pozulması daxildir.

İttiham aktına əsasən, Heybi 2022-ci ilin yayından 2023-cü ilin payızınadək Nora Hauklandı dəfələrlə döyüb və təhqir edib. Təqsirli bilindiyi zorlama hadisələrindən biri 2018-ci ildə Skauqum kral iqamətgahında, digəri isə 2024-cü ilin martında Osloda baş verib.

Təqsirləndirilən şəxs ən ağır ittihamları qəbul etməsə də, keçmiş sevgilisinə hücum və marixuananın daşınması da daxil olmaqla bəzi yüngül hüquq pozuntularını etiraf edib.

Prokurorlar onun 7 il 7 ay müddətinə azadlıqdan məhrum edilməsini tələb etsələr də, müdafiə tərəfi zorlama ittihamları üzrə bəraət və etiraf etdiyi əməllərə görə maksimum 18 ay həbs cəzası verilməsini istəyib.

Qeyd edək ki, Heybi kral ailəsinin üzvü olsa da, taxt-tac varisliyi sırasında yer almır.(axsam.az)