Hakan Fidan Sergey Lavrova nə təklif edib?

“Ankara Rusiya ilə Ukrayna arasında vasitəçiliyə hazırdır”.

Ölkə.az xəbər verir ki, bunu Türkiyənin xarici işlər naziri Hakan Fidan iyunun 16-da Moskvada Rusiya xarici işlər naziri Sergey Lavrovla birgə mətbuat konfransında deyib.

H.Fidan Ankaranın Moskva ilə Kiyev arasında danışıqları davam etdirməyə hazır olduğunu və diplomatiyaya qayıtmağı prioritet hesab etdiyini bildirib.

“Danışıqlar zamanı Ukraynada davam edən münaqişənin mümkün qədər tez bir zamanda sülh yolu ilə həll olunmasını istədiyimizi bildirdik. Həmçinin danışıqların sonrakı mərhələlərini keçirməyə hazır olduğumuzu təsdiqlədim. Ölkəmizin əsas prioriteti Rusiya və Ukraynanın danışıqlar masasına qayıtmasıdır. Tərəflər razılığa gələrsə, danışıqları daha nəticəyönümlü şəkildə necə irəli aparmaq barədə müzakirələrə hazırıq”, - Türkiyənin XİN başçısı bildirib.

O, həmçinin deyib ki, müharibənin son zamanlar daha da şiddətlənməsi və coğrafi yayılma təhlükəsi ciddi narahatlıq doğurur. “Xüsusilə, arxa cəbhədəki hədəflərə edilən hücumların artması və Qara dənizdə naviqasiya təhlükəsizliyini təhdid edən, üçüncü ölkələrin maraqlarına zərər verən hücumlar gərginliyi azaltmaq üçün müəyyən tədbirlərin görülməsini tələb edir", - nazir söyləyib.

H.Fidan bildirib ki, ölkəsi münaqişələr zamanı mülki əhaliyə hücumları heç vaxt bəyənməyib və bu cür hərəkətləri qəti şəkildə pisləyir.

 Mürtəza