Gizli təriqət ifşa olundu: Məşhur simalar var

ABŞ mərkəzli proqram təminatı şirkəti "Palantir”in həmtəsisçisi Piter Tilin gizli bir icma yaratdığı iddia edilib. "Dialog” adlı bu qapalı cəmiyyətə aid qeydlərin sızdırıldığı bildirilərkən, burada yüksək vəzifəli siyasətçilərin, iş adamlarının və texnologiya sektorunun aparıcı fiqurlarının yer aldığı diqqət çəkib. Cəmiyyətin keçirdiyi sessiyalar arasında "III Dünya müharibəsi” kimi mövzuların olduğu irəli sürülüb.

Ölkə.az xəbər verir ki, məlumat analitikası və proqram təminatı şirkəti "Palantir Technologies”in həmtəsisçisi Piter Til tərəfindən yaradıldığı iddia edilən "Dialog” adlı gizli topluluğa aid qeydlərin sızdırıldığı bildirilir. Cəmiyyətdə yüksək vəzifəli siyasətçilərdən tutmuş texnologiya nəhənglərinin rəhbərlərinə qədər geniş bir iştirakçı siyahısının olduğu iddia edilib.

Adlar, sənədlər və gizli görüşlər

ABŞ mərkəzli "Wired” jurnalının xəbərinə görə, 2006-cı ildə Piter Til tərəfindən yaradıldığı iddia edilən "Dialog” adlı qapalı strukturun daxili qeydləri isveçrəli bir kibervolontyor tərəfindən ortaya çıxarılıb.

İddialara əsasən, yalnız dəvətlə üzv qəbul edən bu cəmiyyət ABŞ siyasətçilərini, xarici hökumət nümayəndələrini, maliyyə dünyasının tanınmış isimlərini və Silikon Vadisi rəhbərlərini qapalı toplantılarda bir araya gətirib.

Sızdırıldığı iddia edilən siyahıda NATO-nun Avropadakı Müttəfiq Ali Komandanı (SACEUR) general Aleksus Qrinkeviç, ABŞ Maliyyə naziri Skott Bessent, Demokrat senator Kori Buker, Respublikaçı senator Ted Kruz, "LinkedIn”in qurucusu Rid Hoffmann, iş adamı İlon Mask, Avropa İttifaqının xarici siyasət üzrə ali nümayəndəsi Kaya Kallas, "Palantir” həmtəsisçisi Co Lonsdeyl və ABŞ Quru Qoşunları katibi Den Driskoll kimi adların olduğu irəli sürülüb.

Sessiyanın adı: III Dünya müharibəsi

"Wired” jurnalının araşdırdığı toplantı proqramında "təriqət qurmaq”, "pul xoşbəxtlik ala bilərmi?”, "nüvə silahlarına dönüş”, "III dünya müharibəsi” və "müharibə meydanı texnologiyaları” kimi başlıqların yer aldığı qeyd edilib.

Proqramda həmçinin keçmiş Ağ Ev milli təhlükəsizlik rəsmisinin moderatorluğu ilə "siyasi partiya qurmaq” adlı bir sessiyanın da olduğu bildirilir.

İddialara görə, "Dialog” yalnız siyasi və iqtisadi müzakirələrlə məhdudlaşmayıb, üzvlər arasında sosial əlaqələri gücləndirməyə yönəlmiş onlayn tətbiq də hazırlayıb.

Sözügedən tətbiqin subay üzvlər arasında romantik münasibətlərin qurulmasını təşviq etməyə yönəldiyi də iddialar arasındadır.(qaynarinfo)