Konqoda ebola qurbanlarının sayı artır

Konqo Demokratik Respublikasında (KDR) ebola qızdırmasına təsdiqlənmiş yoluxma hallarının sayı 956-ya, bu xəstəlikdən ölüm faktı isə 247-yə çatıb.

"Ölkə.az" xəbər verir ki, bu barədə ölkənin Səhiyyə Nazirliyi məlumat yayıb.

Nazirliyin məlumatına görə, cari epidemiyanın episentri hesab olunan İturi vilayətində son sutka ərzində 23 yeni yoluxma və 2 ölüm halı qeydə alınıb. Hazırda xəstəxanalarda və tibbi izolyatorlarda 391 pasiyent var, 92 nəfər isə tam sağalıb.

Ən ağır epidemik vəziyyət İturi vilayətində qalmaqdadır. Belə ki, ümumi yoluxma hallarının 91 faizi — 874 yoluxma və 201 ölüm faktı məhz bu bölgənin payına düşür.

Hazırda ebola xəstələri ilə təmasda olanların müəyyən edilməsi səviyyəsi 69.3 faizə çatıb. Ümumdünya Səhiyyə Təşkilatı isə bu göstəricinin 95 faiz təşkil etməsini tələb edir.

Məlumata görə, ebola qızdırmasının cari alovlanması mayın 15-də KDR-in şərqində qeydə alınıb. Qonşu Uqandada da bu xəstəliyə yoluxma və ölüm hallarının olduğu bildirilir.