Bukinqem sarayı ilk dəfə III Çarlzın gəlirlərini açıqlayacaq

Böyük Britaniya kralı III Çarlz müasir dövrdə şəxsi gəlirlərini ictimaiyyətə açıqlayan ilk monarx olacaq. Müvafiq məlumatlar gələn cümə axşamı dərc ediləcək illik maliyyə hesabatında təqdim olunacaq.

"Ölkə.az" xəbər verir ki, bu barədə BBC məlumat yayıb.

Vergi məlumatlarının açıqlanması qərarı kralın şəxsi təşəbbüsü hesab olunur. Bu məlumatlar Bukinqem sarayının ənənəvi maliyyə hesabatının bir hissəsinə çevriləcək və kral ailəsinin maliyyə fəaliyyətində daha böyük şəffaflığa doğru atılmış addım kimi qiymətləndirilir.

Saray nümayəndələri bildiriblər ki, məqsəd cəmiyyətin kral ailəsinin maliyyə məsuliyyəti barədə məlumatlılığını artırmaqdır. Şəffaflıq məsələsi xüsusilə şahzadə Endryu ilə bağlı bir sıra qalmaqallardan sonra daha da aktuallaşıb.

Hesabat 2024–2025-ci maliyyə ilini əhatə edəcək və kralın müxtəlif gəlir mənbələrindən ödədiyi vergilər barədə məlumatları özündə birləşdirəcək. Buraya aşağıdakılar daxildir:

* "Lancaster Duchy”dən əldə olunan gəlirlər;
* investisiya dividendləri;
* "Sandringham” və "Balmoral” şəxsi mülklərindən əldə edilən gəlirlər.

Bu vergi məlumatlarının hər il dərc olunması planlaşdırılır.

Böyük Britaniya qanunvericiliyinə əsasən, monarx gəlir, miras və ya kapital artımı vergisi ödəməyə məcbur deyil. Bununla belə, III Çarlz, daha əvvəl Uels şahzadəsi olduğu dövrdə etdiyi kimi, vergiləri könüllü şəkildə ödəyir.

Məlumatlara görə, təkcə "Lancaster Duchy”dən əldə olunan gəlir ötən il təxminən 24 milyon funt sterlinq təşkil edib. London və İngiltərənin şimalındakı daşınmaz əmlakları əhatə edən bu mülkiyyət kompleksi kralın şəxsi gəlirlərinin əsas hissəsini formalaşdırır.

Maliyyə hesabatı kral sarayının, əməkdaşlarının və rəsmi səfərlərinin maliyyələşdirilməsi üçün ayrılan dövlət vəsaiti — "Sovereign Grant” barədə məlumatlarla birlikdə açıqlanacaq. Bu il həmin maliyyələşdirmənin həcmi rekord səviyyəyə çataraq 137,9 milyon funt sterlinq olub.

Xərclərin artması əsasən Bukinqem sarayında həyata keçirilən genişmiqyaslı yenidənqurma işləri ilə izah edilir. Bununla yanaşı, Böyük Britaniya hökuməti maliyyələşdirmə modelinə yenidən baxılması imkanını nəzərdən keçirir.

Bundan əlavə, Dövlət Hesabları Komitəsi kral mülklərinin istifadəsi və icarə məsələləri ilə bağlı yoxlama aparmağı planlaşdırır. Həmçinin bildirilir ki, şahzadə Endryunun qızları — şahzadə Beatris və şahzadə Yevgeniya "Kensington Palace” və "St James’s Palace” rezidensiyalarında yaşayırlar və həmin mülklərin icarə haqqını kral öz şəxsi vəsaiti hesabına ödəyir.(qaynarinfo)