İranın raket proqramı heç vaxt müzakirə olunmayıb - Şahbaz Şərif

ABŞ və İran arasında imzalanan memorandumda Tehranın raket proqramının məhdudlaşdırılmasından bəhs edilmir.

"Ölkə.az" xəbər verir ki, bunu Pakistanın Baş naziri Şahbaz Şərif deyib.

O, əlavə edib ki, tərəflər bu məsələni müzakirə etməyiblər.

"Tamamilə əminliklə deyə bilərəm ki, anlaşma memorandumunda ballistik raketlərdən bəhs edilmir. Bu məsələ heç vaxt müzakirə olunmayıb, heç vaxt gündəmdə olmayıb və İran tərəfi bunu müzakirə etmək istəməyib", - deyə Şərif İslamabadda İran prezidenti Məsud Pezeşkianla danışıqlardan sonra bildirib.

Pakistanın baş naziri İranın ballistik raket proqramını ləğv etməsi tələbini ədalətsiz adlandırıb, çünki digər ölkələrdə də bu cür silahlar mövcuddur. O, qeyd edib ki, ölkənin raket proqramı ikili standartlar məsələsi ola bilməz.

İran və ABŞ 18 iyun gecəsi memorandum imzalayıblar. Memorandumda Hörmüz boğazının açılması, Livan da daxil olmaqla bütün cəbhələrdə hərbi əməliyyatlara son qoyulması və ABŞ-nin dəniz blokadasının 30 gün ərzində qaldırılması ilə bağlı müddəalar yer alıb. Tərəflər tezliklə münaqişənin yekun həlli ilə bağlı danışıqlara başlamalıdırlar. İki ölkə nümayəndə heyətlərinin ilk görüşü 21 iyunda İsveçrədə baş tutub.

Elvin

Ölkə.az