Rekord istilər səbəbindən nüvə reaktorunun fəaliyyəti dayandırıldı

Fransanın dövlətə məxsus enerji nəhəngi EDF rekord istilər fonunda ehtiyat tədbir kimi iki nüvə reaktorunun fəaliyyətini müvəqqəti dayandırıb.

"Ölkə.az" xəbər verir ki, hər iki reaktorun dayandırılmasına çay sularının temperaturunun yüksəlməsi səbəb olub.

Qeyd edək ki, nüvə elektrik stansiyaları reaktorların soyudulması üçün çay suyundan istifadə edir və daha sonra həmin suyu yenidən çaya buraxır.

İsti havada çaylarda suyun temperaturu təbii şəkildə yüksəldiyindən, operatorlar qanunla müəyyən edilmiş temperatur hədlərinə riayət etmək üçün enerji istehsalını azaltmağa və ya reaktorların fəaliyyətini dayandırmağa məcburdur.

Əlavə olaraq bildirək ki, Fransada istilərlə əlaqəli azı 18 ölüm halı təsdiqlənib. İyunun 18-dən bəri isə ən azı 40 nəfər suda boğularaq həyatını itirib.