Macarıstanda qızıl karvan qalmaqalı: Orbanın adı istintaqda hallanır

Macarıstan mediasında yayılan məlumata görə, ölkə prokurorluğu "qızıl karvan" kimi tanınan qalmaqallı iş çərçivəsində sabiq baş nazir Viktor Orbanın mümkün rolunu araşdırır.

"Ölkə.az" xəbər verir ki, 444.hu nəşrinin iddiasına əsasən, söhbət Ukraynanın "Oshadbank"ına məxsus vəsaitləri daşıyan inkassatorların saxlanılması və pulların müsadirəsi ilə bağlı cinayət işindən gedir.

Nəşrin tanış olduğunu bildirdiyi daxili sənəddə cinayət məsuliyyəti araşdırılmalı olan şəxslərin siyahısı yer alıb. Həmin siyahıda Viktor Orbanın da adı çəkilir.

Sənəddə, həmçinin milli təhlükəsizlik məsələləri üzrə keçmiş dövlət katibi Orş Farkaş və Antiterror Mərkəzinin (TEK) sabiq rəhbəri Yanoş Hadunun da şübhəli şəxs qismində dindirilməsinin mümkün olduğu qeyd edilir.

Məlumata görə, istintaq qanunsuz azadlıqdan məhrum etmə və vəzifə səlahiyyətlərindən sui-istifadə şübhələri üzrə aparılır.

Sənəddə vurğulanır ki, araşdırma yalnız tabelikdə çalışan əməkdaşların ifadələri ilə məhdudlaşmamalı, əsas vəzifəli şəxslərin məsuliyyətinin müəyyənləşdirilməsinə yönəlməlidir.

Macarıstan Prokurorluğu sənədin həqiqiliyini nə təsdiqləyib, nə də təkzib edib.

Qeyd edək ki, hazırda Viktor Orbana qarşı rəsmi ittiham irəli sürülməyib və yayılan məlumatlar Macarıstan mediasında dərc olunan iddialara əsaslanır.(musavat.com)