Avropada rekord istilər: bir çox xəstəxanalar dolub, yüzlərlə ölüm var

Son günlər Avropanı bürüyən ölümcül istilik dalğası tədricən şərqə doğru hərəkət edir. Fransada hava şəraiti nisbətən yumşalsa da, Almaniya və Mərkəzi Avropa rekord temperaturla üz-üzə qalmağa hazırlaşır.

Fransa təhlükə hələ qalır

Ölkə.Az-ın "France 24”-ə istinadla verdiyi məlumata görə, Fransada şənbə günü ölkə ərazisinin yarıdan az hissəsində ən yüksək səviyyəli hava xəbərdarlığı qüvvədə qalıb. Bir gün əvvəl isə ölkənin təxminən üçdə ikisi bu xəbərdarlıq zonasında idi.

Buna baxmayaraq, səhiyyə sistemi hələ də ciddi təzyiq altındadır. Paris regionunda təcili xəstəxana planı aktivləşdirilib. Hakimiyyət axşam saatlarında spirtli içkilərin satışını və açıq məkanlarda istifadəsini qadağan edib. Bir sıra açıq hava tədbirləri təxirə salınıb və ya ləğv olunub.

Fransa hökuməti uzunmüddətli istilik dalğalarına hazırlıq səviyyəsinə görə də tənqidlərlə üzləşir. Məktəblərin bağlanması, xəstəxanalar və yaşlılara qulluq müəssisələrinin bir hissəsində kondisioner sistemlərinin olmaması bu istiqamətdə narahatlıqları artırır.

Rekordlar ard-arda yenilənir

Fransada 23 iyunda ölkə üzrə orta gündəlik temperatur 29,8-29,9 dərəcə selsiyə çatıb. Bu, 1947-ci ildən bəri qeydə alınan ən yüksək iyun göstəricisi kimi qiymətləndirilir. Böyük Britaniyada iyun ayı üzrə temperatur rekordu yenilənib, Belçikanın Uccle bölgəsində isə 33,2 dərəcə selsi qeydə alınıb. 

İspaniyada bəzi bölgələrdə istilik 43-44 dərəcəyə yaxınlaşıb. Ölkənin ictimai ölüm monitorinqi sisteminin məlumatına görə, 21-24 iyun aralığında istilərlə bağlı 212 ölüm qeydə alınıb. Sonrakı günlərdə bu rəqəmin 327-yə çatdığı bildirilir.

Fransada isə istidən yayınmaq üçün suya girən və ya istiliklə əlaqəli hadisələr nəticəsində ölənlərin sayı 60-a yaxınlaşıb. Böyük Britaniya və Almaniyada da boğulma və istiliklə bağlı digər hadisələr nəticəsində onlarla ölüm qeydə alınıb. 

Növbə Almaniyadadır

İstilik dalğası Almaniyaya doğru irəlilədikcə ölkədə rekord temperatur gözlənilir. Cümə axşamı Fransa sərhədinə yaxın Saarbrücken şəhəri yaxınlığında 41,3 dərəcə selsi temperatur qeydə alınıb. Almaniya Milli Meteorologiya Xidməti bunun hələlik ilkin göstərici olduğunu bildirib.

Meteoroloqların məlumatına görə, istilik dalğası həftəsonu pik həddə çatacaq və ölkənin bəzi bölgələrində temperatur 40 dərəcəni ötəcək. Həftənin sonuna doğru hava şəraitinin dəyişəcəyi, bazar günü isə bəzi ərazilərdə güclü leysan yağışlarının gözləndiyi bildirilir.

İstilik həyatı iflic edir

İsti hava artıq nəqliyyat və enerji infrastrukturuna da təsir göstərir. Almaniyanın milli dəmiryolu operatoru "Deutsche Bahn” uzaq məsafəli səfərlər üzrə sərnişinlərə biletlərini əlavə ödənişsiz ləğv etmək imkanı yaradıb. Şirkət bildirib ki, yüksək temperatur, ildırım və yanğın riski dəmir yolu infrastrukturuna əlavə yük yaradır.

Frankfurtda keçirilən "İronmen” Avropa Çempionatında da təhlükəsizlik məqsədilə triatlon yarışının velosiped və qaçış mərhələləri qısaldılıb.

Avropanı "Omega blok” sıxır

İfrat istilər Avropanın digər ölkələrinə də təsir edir. Bir sıra mədəniyyət obyektləri bağlanıb, kənd təsərrüfatı sahələri zərər görüb, bəzi xəstəxanalar isə artan müraciətlər səbəbindən çətinliklərlə üzləşib.

Reuters-in istinad etdiyi iqlim monitorinqi məlumatlarına görə, bəzi bölgələrdə temperatur mövsüm normasında müşahidə olunan göstəricidən 18 dərəcə selsi yüksək olub. Mütəxəssislər bunu "Omega blok” adlanan meteoroloji hadisə ilə izah edirlər. Bu atmosfer sistemi isti havanın uzun müddət eyni ərazilərdə qalmasına, digər bölgələrdə isə sərin hava kütlələrinin saxlanmasına səbəb olur.

Avropa sərinlik axtarır

İstilər fonunda elektrik ventilyatorlarına tələbat əhəmiyyətli dərəcədə artıb. Asiyalı kondisioner istehsalçıları Avropada satışların yüksəldiyini bildirirlər. Mütəxəssislər qeyd edirlər ki, Şimali Avropadakı yaşayış binalarının əksəriyyəti isti havanı dəf etmək üçün deyil, istiliyi içəridə saxlamaq məqsədilə inşa olunub.

Ümumdünya Səhiyyə Təşkilatı istilik dalğasının ayın sonuna doğru Mərkəzi Avropa və Balkan ölkələrinə yayılacağını proqnozlaşdırır.

Alimlər: bu, təsadüf deyil

Alimlərin qiymətləndirməsinə görə, hazırkı istilik dalğası insan fəaliyyəti nəticəsində baş verən iqlim dəyişikliyi olmasaydı, demək olar ki, mümkün olmazdı. Onların hesablamalarına əsasən, bu həftə müşahidə olunan anomal isti gecələrin baş vermə ehtimalı 20 il əvvəllə müqayisədə təxminən 100 dəfə artıb.(Qaynarinfo)