İrana 6 milyard qaytardılar

Son atəşkəs və sülh razılaşması İran xalqı üçün “böyük qələbə” olub və razılaşma çərçivəsində İranın neft və neft-kimya sektoruna tətbiq edilən sanksiyalar aradan qaldırılıb, Qətərdə dondurulmuş 6 milyard dollarlıq İran vəsaiti isə ölkəyə qaytarılacaq.

Ölkə.az “Mehr” agentliyi xəbər verir ki, bu barədə İran Prezidenti Məsud Pezeşkian Qum şəhərinə səfəri zamanı bildirib.

O qeyd edib ki, qaytarılacaq 6 milyard dollar Qətərdə saxlanılan ümumilikdə 12 milyard dollarlıq İran aktivlərinin bir hissəsidir: “6 milyard dolların qaytarılması ilə bağlı razılıq əldə olunub və qalan vəsaitin də geri qaytarılması istiqamətində işlər davam edir”.

Pezeşkianın sözlərinə görə, aktivlərin azad edilməsi və sanksiyaların ləğvi İsveçrədə keçirilən danışıqlar və İslamabad Anlaşma Memorandumu çərçivəsində razılaşdırılıb.

Prezident İranın nüvə silahı əldə etmək niyyətində olmadığını bir daha vurğulayıb: “Beynəlxalq ictimaiyyətə təminat veririk ki, fəaliyyətimiz ölkənin ehtiyaclarına uyğun və elan etdiyimiz siyasət çərçivəsində həyata keçiriləcək”.

Pezeşkian, həmçinin, iddia edib ki, ABŞ sonda İsraili razılaşmanı qəbul etməyə məcbur edib. Onun sözlərinə görə, İsrail və bəzi müxalif qruplar hələ də bu razılaşmanın həyata keçirilməsinə qarşı çıxır.

İran Prezidenti əlavə edib ki, hökumət artıq müharibədən sonrakı bərpa planlarının hazırlanmasına başlayıb və əhaliyə dəstək məqsədilə ərzaq subsidiyalarının maliyyələşdirilməsini artırıb.