Tokayevdən tarixi islahat: Qazaxıstanda hakimiyyət sistemi dəyişir

Qazaxıstan Prezidenti Kasım-Jomart Tokayev ölkədə yeni Konstitusiyanın qüvvəyə minməsindən sonra dövlətçiliyin təməlinin "əsaslı şəkildə yenilənəcəyini" bəyan edib. Onun sözlərinə görə, ölkədə yeni hakimiyyət modeli formalaşdırılacaq: güclü prezident, nüfuzlu parlament və hesabatlı hökumət.

"Ölkə.az" xəbər verir ki, bu barədə Kasım-Jomart Tokayev köhnə çağırış parlamentin hər iki palatasının son birgə iclasında çıxışı zamanı danışıb.

"Biz ölkəmizin müstəqilliyinin möhkəm təməlinə söykənərək, Qazaxıstan dövlətçiliyinin əsaslarını köklü şəkildə yeniləmək, dövlət idarəçiliyi sistemini keyfiyyətcə təkmilləşdirmək məcburiyyətindəyik", - deyə o vurğulayıb.

Xatırladaq ki, martın 15-də Qazaxıstanda prezidentin təşəbbüsü ilə yeni Konstitusiya layihəsi üzrə referendum keçirilib və seçicilərin 87.15 faizi dəyişiklikləri dəstəkləyib.

Yeni islahatlara əsasən, ikipalatalı parlament birpalatalı parlamentlə əvəz olunacaq. Bundan başqa, ölkədə ikinci ali dövlət vəzifəsi hesab edilən vitse-prezident postu da bərpa ediləcək.

Qazaxıstan hakimiyyəti bu dəyişiklikləri cəmiyyətin tələbi və "insan üçün dövlət" prinsipinin daha səmərəli həyata keçirilməsi zərurəti ilə əsaslandırır.