Berlin ABŞ–İran danışıqları ilə bağlı yeni şərtlər irəli sürdü

Ölkə.az xəbər verir ki,  bunu Almaniyanın xarici işlər naziri Yohann Vadeful İsrailə səfəri zamanı keçirilən mətbuat konfransında bildirib.

O, Tehranın nüvə silahı əldə etməsinin qarşısını almaq və ABŞ-İran danışıqlarına İranın ballistik raket proqramı və regional silahlı qruplaşmalara dəstək məsələlərini daxil etmək lazım olduğunu söyləyib.

"İnanıram ki, bu danışıqlarda İsrail və Almaniya arasında kifayət qədər vahid mövqe var", - deyə Vadeful İsrail xarici işlər naziri Gideon Saarla keçirdiyi mətbuat konfransında bildirib.

Vadeful Avropanın ötən il Tehrana qarşı yeni sanksiyalar tətbiq etmək və snapback mexanizmini yenidən aktivləşdirmək qərarına işarə edərək, İranın heç bir halda nüvə silahı əldə etməməli olduğunu vurğulayıb.

Almaniya xarici işlər naziri qeyd edib ki, İranın regional silahlı qruplara və ballistik raket proqramına dəstəyi də ABŞ-İran danışıqlarının bir hissəsi olmalıdır.

O, ötən həftə ABŞ dövlət katibi Marko Rubio ilə görüşdə bu məsələni müzakirə etdiyini bildirib.

“Biz həmişə İranın öz bölgəsindəki davranışının, müxtəlif terror təşkilatlarına dəstəyinin nəzərə alınmalı olduğunu açıq şəkildə bildirmişik. Təkcə Hizbullaha, Həmasa deyil, həm də Husilərə dəstəyi nəzərə alınmalıdır. Husilər təkcə İsraili deyil, həm də Almaniyanın istifadə etdiyi beynəlxalq dəniz və ticarət yollarını təhdid edir. Bu, nəzərə alınmalı və təbii ki, İranın Avropa üçün də təhlükə yarada biləcək ballistik raket proqramı da nəzərə alınmalıdır”, - deyə Vadeful bildirib.

Elvin

Ölkə.az